Aqmola oblysynda qus fabrıkasy ashylady dep kútilýde

ASTANA. 10 shilde. Jergilikti turǵyndardyń qus etine suranysyn qamtamasyz etý maqsatynda Aqmola oblysynda birqatar jobalar júzege asyrylýda. Bul týraly BNews.kz habarlady. Aqmola oblystyq aýyl sharýashylyǵy basqarmasy marketıng jáne aýyl sharýashylyǵy ónimderin óńdeý bóliminiń basshysy Bekbolat Elbergenovtiń aıtýynsha, búginde tıisti kásiporyndar oblys turǵyndarynyń  qus etine degen suranysyn tek 20 paıyzǵa ǵana ótep otyr. Al qus sharýashylyǵy salasynda júzege asyrylyp jatqan jobalardyń arqasynda oblys halqynyń qus etine degen suranysyn 90 paıyzǵa qamtamasyz etýge bolady. Bekbolat Elbergenov: «Bıylǵy jyly Astrahan aýdanynda «Astrahanskaıa ptısa» jaýapkershiligi shekteýli seriktestiginiń óndiristik qýattylyǵy jylyna 3 myń tonnany quraıtyn jobasyn iske asyrýdyń ekinshi kezeńi aıaqtalady. Selınograd aýdanynda Capital Project LTD jaýapkershiligi shekteýli seriktestigi jylyna 20 myń tonna et óndirmek. Onyń qurylysy bıyl bastaldy, 2017 jyly aıaqtalady dep josparlanýda», – dedi. Sol sııaqty, 2014 jyldyń qarashasynda Aqkól aýdanynyń Dombyraly aýylynda qus fabrıkasy ashylǵaly otyr. Bul kásiporyn iske qosylsa, jylyna 90 mln. jumyrtqa jáne 270 tonna qus etin óndire alady. Bir aıta keterligi, joǵaryda atalyp ótken jobalardyń barlyǵy Údemeli ındýstrıaldy-ınnovasııalyq damý memlekettik baǵdarlamasy aıasynda júzege asýda. Joldybaı Bazar. Derekkóz: BNews.kz Foto: strategy2050.kz.