Elimizde vıza berý isi elektrondyq formatqa kóshirilmek

ASTANA. 10 shilde. Ortalyq kommýnıkasııalar qyzmetinde ótken brıfıngte Syrtqy ister mınıstriniń birinshi orynbasary Rápil Joshybaev elimizde vıza berý rásimin elektrondyq formatqa kóshirý josparlanyp otyrǵanyn málimdedi. Bul týraly ortcom.kz habarlady. Rápil Joshybaev: «Elimizge keletin sheteldik azamattarǵa barynsha qolaıly jaǵdaı jasaý maqsatynda vıza berýdiń qoldanystaǵy tártibine ózgerister engiziledi. Sondyqtan, avtomattandyrý, elektrondyq vızalardy rásimdeý boıynsha qyzmetterdi ıntegrasııalaý tárizdi jańashyldyqtar jáne ózge de jeńildikter negizge alynyp otyr. Qazirgi ýaqytta rásimdi elektrondyq formatqa kóshirý tetikteri saralanýda», – dedi. Sondaı-aq, ol vızany rásimdeýdi elektrondyq formatqa kóshirýdiń tıimdi jaqtaryn da sóz etti. R.Joshybaev: «Bul shekarany kesip ótýdi jeńildetý, kóshi-qon esebi jáne qaýipsizdik máselesi boıynsha jasalǵan úlken qadam bolady. Elektrondyq vıza tikeleı qarym-qatynassyz, kez kelgen memlekette qazaqstandyq vızany alý múmkindigin beredi. Vızany elge kelgende shekarda alatyn bolady. Bul jańashyldyqtardy jýyq arada engizýdi josparlap otyrmyz», - dedi. Budan bólek, Syrtqy ister mınıstriniń birinshi orynbasary  AQSh, Ulybrıtanııa, Germanııa, Fransııa, Italııa, Malaızııa, Nıderlandy, Birikken Arab Ámirligi, Koreıa Respýblıkasy jáne Japonııa elderiniń azamattary 2014 jylǵy 15 shilde men 2015 jylǵy 15 shilde aralyǵynda memlekettik shekaradan ótý kezinde 15 kúnge deıin vızalyq talaptardan bosatylatynyn jetkizdi. R.Joshybaev: «Atalǵan bastama ekijaqty baılanystardy nyǵaıtýǵa, áleýetti ınvestorlar men sheteldik isker tulǵalarǵa jaıly jaǵdaı jasaýǵa, sondaı-aq elimizge týrıster shaqyrýǵa baǵyttalyp otyr. Bul óz kezeginde Qazaqstanǵa týrızm salasyn belsendi damytýǵa múmkindik beredi, shaǵyn jáne orta bıznesti damytýǵa, jańa jumys oryndaryn qurýǵa, el bıýdjetin toltyrýǵa áserin tıgizedi dep kútilýde», – dedi. Joldybaı Bazar. Derekkóz: ortcom.kz. Foto: pokupon.by.