Oqys oqıǵa keshe saǵat 16:52-de Ile aýdanyndaǵy Geıt Sıtı yqsham aýdanynda bolǵan. Belgili bolǵandaı, qumdy tıeý jumystary kezinde 35 jastaǵy jumysshynyń oń aıaǵy beton aralastyrǵyshta qysylyp qalǵan.
Respýblıkalyq jedel-qutqarý jasaǵynyń 5 qutqarýshydan qurylǵan jedel toby men Qonaev qalasy jedel-qutqarý jasaǵynyń 4 qutqarýshysy dereý oqıǵa ornyna bardy.
«Qutqarýshylar bolgarkanyń kómegimen zardap shekken er adamnyń qysylǵan aıaǵyn bosatty. Onyń aıaǵy synyp ketken eken. Qutqarýshylar shok alǵan er adamdy jedel járdem brıgadasyna tapsyrdy. Jedel járdem brıgadasy ony birden aýrýhanaǵa alyp ketti», delingen Tótenshe jaǵdaılar mınıstrligi taratqan aqparatta.
