Áleýmettik jelide vlog júrgizetinderge «áı deıtin áje, qoı deıtin qoja» joǵy ras. Ne jazyp, ne salsa da árkimniń erki ózinde. Halyqtyń qamyn emes, qaltasyn oılaıtyndar kóbeıip barady. Blogerler keıde keıbir oqıǵalarǵa ózinshe dolbar jasap, ózin baqylap otyrǵan myńdaǵan adamǵa ótirik aqparat taratady. О́kinishtisi, soǵan qaltqysyz senetinderdiń qatary kóp. Májilis depýtaty óziniń saýalynda vlog júrgizetinderdi jónge salyp, zańǵa arnaıy bap engizý kerek dep dabyl qaqty.
«Qazir ózin blogermin dep júrgenderdiń deni – aqparattyń ras-ótirigin teksermeı, ońaı jolmen baıý maqsatynda kez kelgen adamǵa jala jabýdan taıynbaıtyn, bopsalap aqsha tabatyn, ataqqumar, eldiń berekesin buzyp, qaýipsizdigine qater tóndiretin adamdar. О́zin bloger sanap júrgenderdiń basym bóligi shyn máninde «blogtyń» ne ekenin túsinip júr dep aıta almaımyz. Kópshiligi el aldyndaǵy bedelin, ataq-dárejesin paıdalanyp, halyqqa kómek jasap jatqandaı syńaı tanytyp, áleýmettik jelilerde túrli «haıp» uıymdastyryp álek», dedi Májilis depýtaty.
Onyń aıtýynsha, býyny bekimegen jas balalar da solardy úlgi etip, teris jolǵa ketip bara jatyr. Depýtat Qordaıdaǵy jaǵdaıdy tilge tıek etip, bul ǵana emes, alaıaq blogerlerdiń sózine senip, jer sıpap qalǵandardyń kóp ekenin, tipti, ólimge deıin jetken oqıǵalardyń da bar ekenin atap ótti.
«Sol alaıaqtarǵa senip qalǵan qansha adam sýısıd jasady, qanshasy densaýlyǵynan aıryldy, úısiz-kúısiz qalyp, qańǵyryp ketti?! Olardyń obaly kimge? Elde bolyp jatqan túrli áleýmettik jaǵdaılardy óz yńǵaıyna burmalap, oǵan ultaralyq reń berip, elge jalǵan aqparat taratqan blogerlerdiń de isi maıshammen qaralýy kerek edi. Jeke azamattardyń ishken-jegenin, kıgen kıimine deıin ańdyp, qoǵamda kıberbýllıng jasap júrgen blogerler toby taǵy bar. О́kinishke qaraı, ómirge degen kózqarasy endi qalyptasyp kele jatqan jastarymyz osy blogerlerge eliktep, jatypisherlikke áýestenip barady, olar ultymyzǵa jat mádenıet pen teris ıdeologııany boıyna sińirip jatyr. Biz qysqa ǵana ýaqyt ishinde sózi men isine jaýap bere almaıtyn blogerlerdiń otanyna aınalyp ketkendeımiz», dedi Anas Baqqojaev.
Májilis depýtaty taratqan aqparaty úshin jaýapkershilik arqalamaıtyn blogerlerdiń ádebine qatysty syn aıtty.
«Kimniń bolmasyn aldynda dikeńdep, betten alyp, jeke basyna tıisedi. Sóz bostandyǵy degen osy ma? Biz osylaısha tutastaı bir mamandyqty qor qylyp otyrmyz. Jýrnalısterdiń kóbi jumyssyz júr. Olardyń bilimi de, talaby da bar. Olar blogerlerge qaraǵanda ózderin ádepti ustaıdy, sondyqtan da jumyssyz qalyp otyr», dedi ol.
Májilis otyrysynda depýtat jedel túrde BAQ týraly zańǵa blogerlerge qatysty talap engizip, jaýapkershilik júkteýdi surady.
«Tez arada BAQ týraly zańdy pysyqtap, Májilistiń ashyq talqylaýyna engizý qajet. Aqparat salasyndaǵy jaýapkershilikti tek jýrnalıster emes, blogerler de sezinetin ýaqyt jetti. Bul máseleni atalǵan zań jobasynyń aıasynda dereý qarastyrýymyz qajet. Sebebi jaýapkershilikti túsine almaıtyn blogerlerdiń sany ýaqyt ótken saıyn artyp barady», dedi ol.
