«Elge el qosylsa – qut» deıdi dana halqymyz. Búgingi depýtattyq saýalym Teriskeıge kósh jaıynda bolmaq. Elimizdegi eńbek kúshin retteý maqsatynda júzege asyryp kele jatqan Ońtústikten-Soltústikke qonys aýdarý baǵdarlamasynyń júzege asyp jatqanyna da birneshe jyldyń júzi boldy. «Qýatty óńirler – eldi damytýdyń draıveri» ulttyq jobasyn iske asyrý sheńberinde 2022 jyly Teriskeıge 7923 adam qonys aýdarǵan. Olardyń 1320 qandas jáne 6603 ishki qonys aýdarýshylar bolǵan. Al bıylǵa 8652 adamǵa kvota bólingen. 2021-2025 jyldarǵa bul baǵdarlamaǵa 46,7 mıllıard teńge bólinse de oń nátıjesin bermeı otyr. Sebebi kóship barǵandar kóp uzamaı óz aımaqtaryna qaıtadan kóship jatyr. Resmı statıstıkaǵa súıensek, Soltústik Qazaqstan oblysynyń ózinde-aq mıgrasııa saldosy teris mánge ıe. Sońǵy jyldary ońtústik aımaqtan kóship kelgen 600 adam bul oblystan qaıta kóship ketken», dedi Májilis depýtaty.
Májilis depýtaty másele adamdardy kóshirýde emes sol óńirde turaqtap qalýynda ekenin aıtty.
«Adamdardy kóshirý emes, kóship barǵandardy sol mekende ustap qalý qıyn. Arqa jaıly bolsa, arqar aýyp nesi bar. Soltústik Qazaqstanda jumys kózi az, ómir súrý deńgeıi tómen, berilgen baspanalardyń sapasy syn kótermeıdi. Berilgen jospardy oryndaý úshin san qýyp júrgende sapa umyt qalǵandaı. Soltústikke kóshýge yntaly azamattar kóp», dedi Dáýlet Muqaev.
Onyń aıtýynsha, baǵdarlama aıasynda soltústikke qonys aýdarǵandardyń kóbi berilgen úıdiń sapasyna syn aıtqan. Sondaı-aq Májilis depýtaty soltústikke qonys aýdaratyn otbasylarǵa qosymsha jaǵdaı jasaý týraly usynys bildirdi. Ári basymdyq kópbalaly otbasylarǵa berilý kerek dedi.
«Qonys aýdarǵan aǵaıynǵa jat jerdiń tynys-tirshiligine úırenisýge járdemshi bolatyn arnaıy beıimdeý ortalyǵy men biregeı saıt, jedel jeli telefony iske qosylýy kerek. Sebebi qonys aýdarýshy qandastarymyzdyń kóbi kırıll qaripterin oqyǵanda qınalǵandary baıqalady. Al ózimizdiń jergilikti halyq bolsa kóshi-qon jaıly tolyq aqparat bile bermeıdi. Sebebi aqparattandyrý, túsindirme jumystary óte az. Qonys aýdarýshylardy arnaıy komıssııa negizinde iriktep, kásipke ıkemi bar, kópbalaly otbasylarǵa basymdyq berilý kerek. Qonys aýdarǵannan keıin týǵan ár sábıge de beriletin járdemaqy deńgeıin arttyrý demografııaǵa serpin bereri sózsiz», dedi Májilis depýtaty.
