Atalǵan is-sharaǵa Astana qalasynyń máslıhat depýtaty, áleýmettik-mádenı damý jónindegi turaqty komıssııanyń múshesi Jandos Rahmet, máslıhat depýtaty Azamat Aıthojın, Saryarqa aýdanynyń ákimi Baýyrjan Eraly, Jumyspen qamtý jáne áleýmettik qorǵaý basqarmasynyń basshysy Ilıa Skýb jáne «Amanat» partııasynyń Almaty aýdandyq fılıaly tóraǵasynyń orynbasary Igor Nesen qatysyp, qoǵamdyq birlestiktiń lentasyn qıdy.
– Prezıdent Qasym-Jomart Toqaevtyń Joldaýynda serebraldy sal aýrýyna shaldyqqan balalarǵa medısınalyq jáne áleýmettik qoldaý kórsetý sapasyn jaqsartý máselesi aıtylǵan. Onyń ishinde erekshe qajettiligi bar balalarǵa arnalǵan shaǵyn jáne ortasha ońaltý ortalyqtary jelisin arttyrý máselesi aıryqsha tapsyrylǵan edi. Soǵan sáıkes qazir elimizdiń biraz jerinde ońaltý ortalyqtary ashylyp jatyr. Sonyń biri – múmkindigi tómen balalarǵa arnalǵan «Bereke Astana» múgedekterdi damytý jáne olardy ońaltý respýblıkalyq ortalyǵy, – dedi I.Nesen.
О́z kezeginde Saryarqa aýdanynyń ákimi Baýyrjan Eraly bar ynta-shyntasyn arnap, erekshe qajettiligi bar balalardy tárbıelep jatqan barlyq mamanǵa aıryqsha alǵys bildirdi.
– Biz úshin árbir baldyrǵannyń densaýlyǵy men ómiri óte mańyzdy. Ońaltý ortalyqtarynyń ashylyp jatqanyna óte qýanyshtymyz, qaıyrly, qutty bolsyn! Baldyrǵandardyń osy ortalyqtan bilim alýyna, damyp jetilýine tilektespiz. Árbir bala óz otanynyń ystyq alaqanyn sezinip ósýi kerek. Sondaı-aq ákimdik ortalyqtyń jumysyn árqashan qoldaýǵa ázir ekenin bildiremin, – dedi quttyqtaý sózinde.
«Bereke Astana» balalardy damytý jáne ońaltý ortalyǵynda logoped, defektolog, fızıoterapevt, massajıst qatarly túrli mamandar qyzmet kórsetedi.
– Múmkindigi tómen balalardy tárbıelep otyrǵan kóptegen ata-ananyń jaǵdaıy men ómir súrý deńgeıi ártúrli. Sondyqtan olar mamandardyń eńbegin aqyly túrde paıdalanýy qıyn. Máselen, qazir logoped, defektolog, fızıoterapııalyq jattyǵýlar men massajdyń aqyly qyzmetteri qymbat. Osy jaǵdaılardy eskerip, erekshe qamqorlyqqa muqtaj balalardy qoldaý maqsatynda biz Astana qalasy Saryarqa dańǵyly, 48 mekenjaıynda múmkindigi tómen balalarǵa arnalǵan «Bereke Astana» balalardy damytý jáne ońaltý ortalyǵyn ashtyq, – deıdi respýblıkalyq qoǵamdyq birlestiktiń basshysy Aıgúl Bolatova.
Aıgúl Rahymqyzynyń aıtýynsha, ortalyq qazirdiń ózinde 300-den asa múmkindigi shekteýli balalarǵa qoldaý kórsetip otyr.
– Bizdiń ortalyqtyń maqsaty – múmkindigi tómen balalardy sátti ońaltý jáne qoǵamdyq ortaǵa beıimdeý. Ol úshin defektolog, logoped, psıholog, áleýmettik pedagog, jattyǵý terapııasynyń nusqaýshylary, ergoterapevt, AVA-terapevterdiń qyzmetterin tegin usynamyz. Bizdiń ortalyqtyń búgin resmı ashylý saltanaty bolyp jatqanymen, jumysyn budan biraz buryn bastap ketken edi. Bastaǵan jumysymyzǵa saı qazirdiń ózinde balalar jaqsy nátıje bere bastady. Olar alǵashqy sózderin aıtyp, alǵashqy qadamdaryn basty. Balalardyń qarym-qatynas daǵdylary da jaqsaryp keledi, – deıdi ol.
Jıynǵa qatysqan ata-analardyń da ortalyqqa degen alǵysy erekshe. Ásirese, Altynaı Esenǵabyl esimdi ata-ana ortalyqtyń alǵashqy aıaq alysy, qyzmet kórsetý sapasy kóńilden shyǵyp kele jatqanyn aıtady.
– «Bereke Astana» ortalyǵy ashylǵaly túrli mamandardyń kómegine júginý qıyn emes. Qazir aptasyna eki ret áleýmettik pedagog mamany úıge kelip, balamyzǵa bilim berip júr. Ortalyqtan mereke kezderinde balalarǵa syılyqtar berilip turady. Onyń balalar úshin orny erekshe ekenin aıtyp jetkizý múmkin emes. Elimizde erekshe balalarǵa erekshe qamqorlyq kórsetilip jatqanynyń bir kýási – osy. Barlyǵy tegin, biraq tegin bolǵanymen qyzmet kórsetý sapasy da jaman emes. Sondyqtan ortalyqtaǵy mamandarǵa alǵys aıtamyz, – deıdi Altynaı Bolatkyzy.
