«Búgin – Halyqaralyq múgedekter quqyǵyn qorǵaý kúni. Bul – múmkindigi shekteýli azamattardyń quqyǵyn qorǵaý máselesine qalyń jurtshylyqtyń nazaryn aýdarý úshin qolǵa alynǵan ıgi bastamalardyń biri. Jalpy, Dúnıejúzilik densaýlyq saqtaý uıymynyń málimeti boıynsha, qazirgi tańda álemde múgedektigi bar adamdardyń sany 1 mlrd-tan asady. Bul kórsetkish jer betindegi halyqtyń 15 paıyzyna jýyǵyn quraıdy. Onyń ishinde 100 mln-nan astamy balalar ekenin atap ótken jón», dep jazdy M.Áshimbaev.
Onyń aıtýynsha, atalǵan másele bizdiń elimiz úshin de ózekti. Búginde Qazaqstanda 700 myńnan astam múmkindigi shekteýli azamat bolsa, onyń 14 paıyzǵa jýyǵy 18 jasqa deıingi balalar.
«Shyn máninde, bul sanattaǵy azamattarǵa óz quqyqtaryn qorǵaý ońaı emes. Olar kóbine osy baǵytta túrli kedergiler men qıyndyqtarǵa tap bolyp jatady. Sondyqtan ınklıýzıvti qoǵam qurý, múgedektigi bar adamdardyń densaýlyǵyn saqtaý, olardy sapaly bilimmen jáne jumyspen qamtý máseleleri únemi Memleket basshysynyń nazarynda. Bul baǵyt elimizdegi áleýmettik saıasattyń negizgi basymdyqtarynyń biri ekenin de aıta ketken abzal.
Búginge deıin Qazaqstanda osy salada aýqymdy jumys atqaryldy. Desek te, aldymyzda odan da zor mindetter tur. Sondyqtan qazir Senat ınklıýzııa máseleleri jónindegi arnaıy zań jobasyna bastamashylyq jasaý jumystaryn qolǵa aldy. Mundaı qujat múgedektigi bar azamattarymyzdyń quqyǵyn qorǵaýdy odan ári kúsheıte túseri sózsiz.
Halqymyz «kelisip pishken ton kelte bolmas» deıdi. Sol sebepti, múddeli taraptardy ınklıýzıvti qoǵam qurý jolyndaǵy osyndaı ıgilikti iske belsendi qatysýǵa jáne ózderiniń usynys-pikirlerin bildirýge shaqyramyz», delingen jazbada.
