Ánýar Álimjanov kóshesindegi 40 jáne 20 páterlik jalgerlik turǵyn úıdiń kiltin oblys ákimi Beıbit Isabaev tabys etti. Jetisýlyqtarǵa júrekjardy lebizin joldap, keshigip berilgenine keshirim de surady.
«Turǵyn úımen qamtamasyz etý – halyqtyń ómir súrý sapasyn kóterýdegi eń basty máselelerdiń biri. Prezıdenttiń aldymyzǵa qoıyp otyrǵan úlken talaby da osy. Sondyqtan memlekettik baǵdarlamalardyń arqasynda biz qazir osy máselege erekshe nazar aýdaryp, qolǵa alyp otyrmyz. Qazir Taldyqorǵan qalasynda turǵyn úı kezeginde 15 myńdaı adam tur. Ádildikpen, ashyqtyqpen jumys isteı otyryp, olardy kezek reti boıynsha aldaǵy birneshe jylda baspanamen qamtý úshin qurylys qarqynyn jyldamdatyp, turǵyn úı salý kólemin arttyratyn bolamyz, dedi B.Isabaev.
Sońǵy eki jylda óńirde turǵyn úı qurylysy báseńdep, úı berý birshama kesheýildegeni belgili. Áıtse de onyń óz sebebi bar. Qurylys júrgizgen merdigerlerdiń jaýapsyzdyǵy, bastaǵan qurylysty aıaqsyz qaldyrýy, koronavırýs indeti sııaqty túıtkilder istiń sozylyp ketýine basty sebep boldy. Onyń ústine kezeksiz úı berýdiń kóptegen faktisi oryn alǵany da kópke málim. Qazir zańsyz berilgen úılerdi sot arqyly qaıtaryp alý jumystary júrip jatyr
«Nurly jer» baǵdarlamasymen turǵyzylǵan bul úıge kezektegi 60 turǵyn qol jetkizdi. Olardyń deni kópbalaly jáne tolyq emes otbasylar, múmkindigi shekteýli jandar men osyndaı bala asyrap otyrǵan otbasylar, jetim balalar, aýǵan soǵysynyń ardagerleri jáne basqa da áleýemettik osal topqa jatatyn azamattar.
Jańa baspanaǵa kirgender atynan múgedek bala asyraýshy otbasynan Aqmaral Alshynbaeva, tolyq emes otbasy sanatyndaǵy Nazgúl Beısenbekova, basqa da qonystoı ıeleri memleketten jasalyp otyrǵan qamqorlyq úshin rızashylyqtaryn bildirip, baspanaǵa ıe bolǵan kórshilerine izgi tilekterin jetkizdi.
Oblys ákimi Beıbit Isabaev zeınetker Shamshamaný Ábeýova men kópbalaly Beıisbekovter shańyraǵyna kirip, dám tatyp, teledıdar syıǵa tartty.
«Otaǵasy Tileýli ekeýmiz alpys jyldan astam birge ǵumyr keship kelemiz. Aqsý aýdanynda uzaq jyl pedagogıka salasynda jumys istedim. Eńbegim eleýsiz qalǵan joq, shúkir. Bes ul, bir qyz tárbıelep ósirdik. Eki balam ózimniń jolymdy qýyp, muǵalim boldy. Búgin úlken qýanyshqa jetip otyrmyz. Osyndaı jaqsy jańalyqtar kóp bola bersin. El irgesi aman, ósip kele jatqan bala-shaǵanyń ómiri jarqyn bolsyn dep tileımin, dedi bilim salasynda uzaq jyl eńbek etken zeınetker, «Bilim salasynyń úzdigi» Shamshamaný Ábeýova.
Aıta keteıik, bul úılerdiń qurylysyn «Qurylysshy TBS» JShS merdiger kompanııasy 2021 jyldyń jeltoqsanynda salyp bitirgen. Biraq abattandyrýmen aınalysýǵa tıis basqa kompanııanyń jaýapsyzdyǵynan úıdi paıdalanýǵa berý kesheýildep, jumystardyń aıaqtalýy kúni búginge deıin sozylǵan.
«Bul úılerdiń qurylysyn 2021 jylǵy mamyrda bastap, sol jyldyń sońynda aıaqtadyq. Qurylys sapasy óte jaqsy dep senimmen aıta alamyn. Jobada múmkindigi shekteýli azamattarǵa arnalǵan jınalmaly elektrondy pandýs qarastyrylmaǵan bolatyn. Biraq oblys ákiminiń tapsyrýymen biz on kúnniń ishinde óz qarajatymyzǵa sol pandýsty qoıyp beremiz», dedi qurylys kompanııasynyń ókili Marat Ilııasov.
Oblys ákimniń baspasóz qyzmetiniń málimetinshe, qoldanysqa berilgen 20 páterlik úıde 5 eki bólmeli, 15 úsh bólmeli páter bolsa, 40 páterlik úıde 10-y – bir bólmelik, 10-y eki bólmelik, 20-sy – úsh bólmelik páterler. Bul úılerdi salýǵa «Nurly jer» baǵdarlamasy boıynsha 722 mln teńge bólinip, ıgerilgen.
Jalpy, óńir kóleminde bıyl 321,9 myń sharshy metr turǵyn úıdi paıdalanýǵa berý josparlanyp otyr. Sol qatarda jyl sońyna deıin Taldyqorǵan qalasynda 51 turǵyn úı qoldanysqa beriledi. Sonyń 42-si jergilikti bıýdjetten salynsa, qalǵanyn jeke kásipkerler men mesenattar óz qarajattaryna turǵyzyp jatyr. Sóıtip, bir jylda 2 myńǵa jýyq taldyqorǵandyq otbasy baspanaly bolady.
Jetisý oblysy
