Qazaqstanda 2009 jyldan bastap iske qosylǵan «Dıplommen aýylǵa» jobasy búgingi kúnge deıin jumysyn jalǵastyryp keledi. Joba sheńberinde jumysqa ornalasqan mamanǵa 100 AEK, ıaǵnı 345 myń teńge kóleminde birjolǵy járdemaqy beriledi. Al turǵyn úı satyp alý úshin 0,1 paıyzben (15 jylǵa) 15 500 AEK, ıaǵnı 5 mln 200 myń teńgelik nesıe túrinde áleýmettik qoldaý sharalary kózdelgen. О́z mindettemesin oryndap, 3 jyl aýylda jumys istegen mamandar tıisti merzim aıaqtalǵan soń júgin býyp-túıip, qaıtadan qalaǵa kóship ketip jatyr.
«Aýylǵa kóshken jas mamandar baǵdarlamadan aınyp, qalaǵa qaıtyp ketýdiń salmaqty sebebi - turǵyn úıdi satyp alý qıyndyqtary men ortalyqtandyrylǵan sý, gaz, jylý jabdyqtalýynyń joqtyǵy. Nátıjesinde kóptegen aýyl turǵyndary áli kúnge deıin tájirıbeli muǵalimsiz, bilikti dárigersiz otyr. Memleketten bólinetin bir rettik 345 myń teńge nege jetedi? Qazirgi aýyldaǵy azyq-túlik qaladaǵy qunmen birdeı. Úıge dep bólinip bergen 5 mln teńgege úı satyp ala alasyz ba? Álde joba sheńberinde aýylǵa kóship barǵan maman sol aýylda kvartırant bolý kerek pe?», dedi «Jalpyulttyq sosıal-demokratııalyq partııasy» fraksııasynyń múshesi Naýryz Saılaý.
Osy oraıda depýtattar aýyldyq jerlerge barǵan mamandarǵa jaǵdaı jasaý maqsatynda kelesi usynystardy alǵa tartty.
- Mamandarǵa beriletin bir rettik kóterme járdemaqyny ár otbasy múshesine, ıaǵnı adam basyna myń jarym AEK - 500 020 teńgege deıin arttyrý;
- «Dıplommen aýylǵa» baǵdarlamasynyń krıterıılerine túzetý engizý. Atap aıtqanda, jas mamandarǵa turǵyn úı úshin 5 mln kredıt bergenshe, jańa úıler salyp berý nemese turǵyn úı satyp alýǵa jáne salýǵa beriletin nesıe mólsherin aýyldyń, eldi-mekenderdiń geografııalyq ornalasqan jerine baılanysty 3 myń AEK - 10 mln teńgege deıin ulǵaıtý.
- Baǵdarlama aıasynda aýyldyq jerlerge baratyndardyń 70%-y jas otbasylar bolǵandyqtan, mindetti eńbek ótilimin 3 jyldan 5-7 jyl aralyǵyna deıin uzartý.
- Baǵdarlamanyń aýqymyn keńeıtip, oǵan monoqalalar men shaǵyn qalalardy usynysqa engizý.
Arýjan NAǴAShYBAI,
L.N.Gýmılev atyndaǵy EUÝ stýdenti
