Indýstrııa jáne ınfraqurylymdyq damý mınıstri Marat Qarabaevtyń aıtýynsha, is-sharany uıymdastyrýdaǵy negizgi maqsat – elimizdegi ındýstrııalyq-ınnovasııalyq keshenniń turaqty damýyna yqpal etý. Resmı ashylý saltanatynan keıin vedomstvo basshysy men «Qazaqstan mashına jasaýshylar odaǵy» ZTB basqarma tóraǵasy Meıram Pishembaev kórmege qoıylǵan ekspozısııalardy aralap shyqty.
«Kórmeniń mańyzdylyǵy jyldan-jylǵa artyp keledi. Mundaı formattaǵy is-sharalar bıznes úshin úlken múmkindikterge jol ashady. Atap aıtqanda, ınvestısııalar men jańa tehnologııalardy tartý, jańa seriktester tabýda úlken úles qospaq», dep atap ótti M.Pishembaev.
ONDEU EXPO 6 mańyzdy beıindi halyqaralyq kórmelerdi biriktiretinin aıta ketken oryndy. Atap aıtqanda, Kazakhstan Machinery Fair, Su Arnasy – Water Expo, AgroSpecMash, Shem Tech Kazakhstan, Stroy Expo Astana jáne Infra Tech Kazakhstan.
Indýstrııa jáne ınfraqurylymdyq damý vıse-mınıstri Dınara Sheglova ONDEU EXPO óńdeý ónerkásibiniń halyqaralyq kórmesi aıasynda uıymdastyrylǵan «О́nerkásipti sıfrly transformasııalaý» paneldik sessııasyna qatysyp, Indýstrııa 4.0 tehnologııasyn engizýdiń mańyzdylyǵyna toqtaldy. Vıse-mınıstr aıtqandaı, qazir elimizde sıfrly tehnologııalarǵa basymdyq bergen iri jáne orta ónerkásip kásiporyndarynyń úlesi 12,9%-ǵa jetip otyr. Bul rette jyldyq ósim orta eseppen 3,5% mejesinde baıqalyp otyrǵanyn aıta keteıik.
«Indýstrııa 4.0 – ónerkásip kásiporyndaryn aqparattyq tehnologııalardyń negizinde damytýǵa baǵyttalǵan tyń qadam. Bul óndiristik úderisterdiń tıimdiligin aıtarlyqtaı arttyrýǵa jol ashady. Osy aýqymdy jıynnyń saladaǵy ózekti máselelerdi sheshýde mańyzdylyǵy joǵary. Máselen, qazir otandyq ónerkásiptiń Ulttyq aqparattyq júıesin qurý jónindegi jumys qolǵa alynǵanyn aıta ketken oryndy. Onyń nátıjesinde barlyq múddeli tarap, atap aıtqanda, memleket, IT-kompanııalar, damý ınstıtýttary men ónerkásip kásiporyndary ortaq sıfrly ekojúıede birigip, úılesimdi jumys atqaratyn bolady», dedi vedomstvo ókili.
