Jyl saıyn 22 naýryz ben 5 maýsym aralyǵynda osy aksııany ótkizýdi dástúrge aınaldyrǵan ınspektorlar rezervat aýmaǵyndaǵy joıylý qaýpi bar ósimdikter men «Qyzyl kitapqa» engizilgen janýarlar jóninde dárister ótkizedi. Sondaı-aq jurtshylyqty ózen-kól arnalaryn tazartyp, turǵyn úıler men memlekettik mekeme aýlalaryna aǵashtar men butalar, basqa da kópjyldyq ósimdikter egip, kógaldandyrý jumystaryna shaqyrady.
Eki ǵasyrdan beri AQSh pen Batys memleketterinde erte kóktemde turaqty túrde ótkiziletin «Parkter sherýi» aksııasyna Qazaqstan 1997 jyly ǵana qosyldy. «Tabıǵatyńdy taza usta!» degen uranmen bastalǵan jalpyhalyqtyq is-sharanyń aýqymy el aýmaǵynda erekshe qanat jaıyp, jyl saıyn osy is-sharaǵa belsendi qatysatyn azamattar qatary kóbeıip keledi.
Eń alǵash ret 1840 jyldyń 22 sáýirinde AQSh-ta aǵash egý kúni retinde bastalǵan is-shara 1882 jyly memlekettiń resmı merekeleri sanatyna endi. Tabıǵat janashyrlarynyń basyn biriktirgen aksııa 1970 jyldan bastap «Jer kúni» merekesi bolyp ózgerdi. Adamzat óz úıi – Jerdiń betin qoqystardan aryltyp, aǵash-buta otyrǵyzýdy nasıhattaıtyn 22 sáýir merekesi 1990 jyly «Parkter sherýi» bolyp ózgergen kúni álemde bir mezgilde uıymdastyrylǵan aǵash otyrǵyzý aksııasyna 141 memleketten 200 mln adam qatysqan.
Yrǵyz-Torǵaı memlekettik tabıǵı rezervatynyń Ekologııalyq aǵartý jáne týrızm bóliminiń bas mamany Ásemgúl Ábdirahmanova 22 naýryzdan beri «Parkter sherýi» aksııasy arqyly mektep oqýshylaryna ekologııalyq tárbıe berý jumysy qarqyndy júrgizilip jatqanyn aıtady.
«Bizdiń mekeme ınspektorlary mektep oqýshylary arasynda «О́z elimdi súıemin, tabıǵatyna bas ıemin» taqyrybynda sýret salý jáne elimizdiń kórikti jerleri týraly shyǵarma jazý, «Qustarǵa qamqor bolaıyq» jáne «Quralaı» qolóner baıqaýlaryn uıymdastyrdy. «Qustarǵa qamqor bolaıyq» is-sharasy sáýirdiń sońynda aıaqtaldy. Osy konkýrs sharty boıynsha oqýshylar óz qoldarymen jasaǵan qus uıashyqtaryn aǵash-terek basyna ornalastyryp, sýretin áleýmettik jelige salýǵa tıis bolatyn. Biraq onyń qorytyndysy 5 maýsymda shyǵarylady. Al «Quralaı» qolóner konkýrsynyń sharty boıynsha oqýshylar ártúrli materıaldardan ań-qustyń músinin jasap, onyń rezervat mekemesine ákelip tapsyrýy kerek. Kıiktiń beınesin jasaýǵa gıps, aǵash, saz balshyq, túrli jipterdi qoldanýǵa bolady. Osy tórt baǵyt boıynsha uıymdastyrylǵan konkýrs qorytyndysy 5 maýsymda shyǵarylyp, balalarǵa túrli syılyqtar tapsyrylady», deıdi Á.Ábdirahmanova.
Byltyr Yrǵyz-Torǵaı memlekettik tabıǵı rezervaty qyzmetkerleri «Parkter sherýi» aksııasy boıynsha 78 is-shara uıymdastyryp, oǵan Aqtóbe oblysynan 5 myń adam qatysqan. Tabıǵatty lastamaý, qoqys tastamaý, kógaldandyrý jumystaryn turaqty túrde júrgizý, ózen-kólderdiń boıyn taza ustaý, balalarǵa ekologııalyq tárbıe berý – osy izgilikti jumystyń basty baǵyttarynyń biri.
Aqtóbe oblysy
