Jyl saıyn 15 mamyrda BUU Bas Assambleıasy 1993 jyly bekitken Halyqaralyq otbasy kúni merekelenedi. Osylaısha, bizdiń memleket te eldiń turaqtylyǵy men ál-aýqatynyń kepili – otbasy ınstıtýtyna zor qoldaý kórsetedi.Bul oraıda el Prezıdenti «Myqty jáne baqytty otbasy – elimizdiń ál-aýqaty men órkendeýiniń negizi. Memleket otbasy ınstıtýtyn qoldap, keshendi otbasylyq saıasat júrgizetin bolady» degen edi.
El arasynda erekshe yqylasty ıelengen «Mereıli otbasy» on jyldan beri otbasynyń qoǵamdaǵy ornyn aıǵaqtap keledi. Dástúrge aınalǵan ulttyq baıqaýda aýdan-qalalardaǵy ónegeli otbasylar óz shańyraqtarynyń shattyǵyn kópshilikke pash etpek.
Sán-saltanaty kelisken atalǵan sharada oblys ákiminiń orynbasary Erbol Áliqulov jınalǵan qaýymdy merekemen quttyqtap, júrekjardy lebizin bildirdi.
«Otan – otbasynan bastalady». Sol sebepti bul – erekshe mereke. Sebebi barlyǵynyń bastaýynda otbasy tur. Adamnyń jaqsy adam bolýy – otbasynan. Barsha jaqsylyqtyń qaınar kózi – otbasy. Otbasy arqyly dúnıeni tanımyz. Osydan otyz jyl buryn Halyqaralyq otbasy kúni jarııalanǵany belgili. Biz jyl saıyn osy merekede «Mereıli otbasy» ulttyq baıqaýyn ashamyz, dedi Erbol Shymkentbaıuly.
«Otbasyndaǵy basty qundylyq – tárbıe. Negizgi qaınar kózi – ulttyq tárbıe. Sonyń arqasynda búgingideı kúnge jettik», deıdi otasqandaryna 50 jyl tolǵan Ahmetovter otbasy. Otaǵasy Nurabaı Ahmetov – qurylysshy, otanasy Bıken Ahmetova – Qazaqstannyń Qurmetti jýrnalısi. Igi sharada izgi tilekterin bildirgen altyn toı ıeleri búginde 3 bala tárbıelep, 5 nemere súıip otyr.
Halyqaralyq otbasy kúninde keshe ǵana shańyraq kótergen jas jubaılarǵa, altyn toı ıelerine, 8 bala tárbıelep otyrǵan (onyń 6-ýy patronatty tárbıedegi balalar) otbasylaryna qurmet kórsetildi. Árqaısysyna 100 myń teńge kólemindegi syılyqty túrli qoǵamdyq uıym tabys etti.
Úılengenderine nebári bir apta ǵana bolǵan Nurshýaq Alpys pen Ásel О́mirzaq eki jyl buryn tanysyp, otaý qurýǵa sóz baılasypty. Nurshýaq – polısııa ınspektory. Ásel – psıholog. Jas jubaılardyń alǵa qoıǵan maqsattary aıqyn. Bosaǵasy berik, shańyraǵy bıik ordaly otbasy ataný. Ultqa paıdasy tıer urpaq órbitý.
«Bizdiń úılengenimizge bir apta ǵana. Oǵan deıin tanysyp, bilisip, sodan soń baryp osyndaı jaýapty sheshim qabyldadyq. О́ıtkeni «Úılený ońaı, úı bolý qıyn» ekeni anyq. Otbasylyq ǵumyr – ómirdegi eń mańyzdy qadam. Sondyqtan jar tańdaýda adam shataspaýy tıis», deıdi Nurshýaq.
Erli-zaıypty Erkebulan Kataev pen Aızat Qalymjanova – kópbalaly otbasy. Olar ózderiniń eki sábıimen qatar, patronatty tárbıege 6 balany alǵan. Olardy qanattyǵa qaqtyrmaı, tumsyqtyǵa shoqyttyrmaı, 8 balany mápelep keledi.
«Bizde segiz bala bar. Úlkenderi Á.Moldaǵulova atyndaǵy oblystyq mamandandyrylǵan sport mektebinde oqıdy. Ekeýi sport sheberligine kandıdat. Kenjelerimiz mektepte. 2020 jyly patronattyq tárbıege alǵan balalardyń anasy qaıtys bolǵan. Ákesi joq. Balalardyń bári bir otbasynan. Ras, basynda júreksindik. О́z balalarymyz bizdiń sheshimimizge túsinistik tanytty. Shúkir, qazir bári tatý», deıdi Aızat Qalymjanova.
Qaraǵandy oblysy
