Qytaı alǵash ret Ortalyq Azııa kóshbasshylarynyń sammıtin ótkizdi. Qytaıdyń soltústik-batysyndaǵy Sıan qalasyna energetıka men aýylsharýashylyq resýrstaryna baı el, baıtaq dalasy bar qazaq memleketiniń basshysy Qasym-Jomart Toqaev Ortalyq Azııa elderiniń bes kóshbasshysy arasynan birinshi bolyp sammıtke keldi.
«Sizdiń Qytaıǵa memlekettik saparyńyz eki el arasyndaǵy qarym-qatynastyń joǵary deńgeıin kórsetedi jáne Qytaımen myzǵymas baılanysty taǵy bir ret rastaıdy», dedi Qytaı Tóraǵasy áriptesine.
Al Q.Toqaev Sı Szınpınge ekijaqty saýda aınalymy 2022 jyly 31 mıllıard dollardan asqanyn, 2030 jylǵa qaraı ony 40 mıllıard dollarǵa arttyrýdy kózdeıtinin jetkizdi. «Qazaqstan Qytaıǵa aýyl sharýashylyǵy ónimderiniń eksportyn keńeıtýge múddeli. Biz burshaq daqyldaryn, joǵary sapaly jáne ekologııalyq taza muzdatylǵan sıyr men qoı etin jetkizýge daıynbyz», dedi Q.Toqaev.
«Myqty dostyq»
Qytaı Tóraǵasy Sı Szınpın Ortalyq Azııany damytý josparlarymen tanystyrdy. Ol Sıandaǵy sammıtte Ortalyq Azııanyń bes memleketiniń basshylarymen kezdesip, saýda men energetıkany damytýǵa shaqyrdy.
«Ál-Jazıra» telearnasynyń tilshisi Djessıka Vashıngtonnyń aıtýynsha, Sı Szınpın Qazaqstan Prezıdenti Qasym-Jomart Toqaevqa Qytaı men Qazaqstan «myqty dos» ekenin aıtqan.
Qazaqstan – Qytaı úshin senimdi ári strategııalyq seriktes. Eki el arasyndaǵy saýda-sattyq, ınvestısııa, eksport kólemi jyl saıyn artyp keledi.
Sı Szınpın Qazaqstannan basqa memleket basshylaryna olardyń damý joldary táýelsiz tańdalatynyn, qurmetteletinin jáne olardyń egemendigi, qaýipsizdigi, táýelsizdigi men aýmaqtyq tutastyǵy qorǵalatynyn aıtty.
«Altyn onjyldyq»
Qytaı Tóraǵasy Sı Szınpın Qazaqstan Prezıdenti Qasym-Jomart Toqaevty eki el qarym-qatynasynyń aldaǵy úsh altyn onjyldyǵymen quttyqtap, ortaq damý jolyndaǵy yntymaqtastyqty keńeıtýge ýáde berdi. Sondaı-aq ol Qazaqstannyń senimdi dos, baýyr jáne seriktes ekenin aıtty.
Qytaı men Qazaqstan qarym-qatynasy úshinshi altyn onjyldyqqa aıaq basty. Máselen, «Bir beldeý – bir jol» (BRI) bastamasy 10 jyl buryn iske asyrylǵaly eki el halqyna paıda ákelip, ortaq damýǵa yqpal etetin ondaǵan iri yntymaqtastyq jobalaryn sátti júzege asyrdy. Ol ekijaqty ekonomıka jáne saýda, ınvestısııa, aýyl sharýashylyǵy jáne energetıka salalaryndaǵy yntymaqtastyqty keńeıtýge, baılanysty tereńdetýge, elektrondy saýda, ınnovasııa jáne úlken derekter sııaqty jańa salalardaǵy yntymaqtastyqty keńeıtýge yqpal etti.
Kezdesý kezinde Sı Szınpın ózara mádenı ortalyqtar qurý, Lýban sheberhanasyn ashý, vızadan bosatý týraly kelisimge qol qoıýdy mádenı jáne jeke tulǵalar arasyndaǵy yntymaqtastyqty nyǵaıtý múmkindigi retinde qabyldaýǵa shaqyrdy. Al Q.Toqaev Sı Szınpınniń Qazaqstan-Qytaı qarym-qatynasy týraly pikirimen jáne ekijaqty yntymaqtastyqty odan ári nyǵaıtý jónindegi usynystarymen kelisetinin aıtty.
