Eske sala ketsek, 18 mamyrda bastalǵan bas emtıhan 5 shildege deıin ótedi.
UBT-nyń alǵashqy 5 kúninde Shyǵys Qazaqstan oblysy men Almaty qalasynda oqıtyn eki talapker eń joǵary nátıje kórsetti. Olar jalpy 140 baldyń 133-in jınady.
Bıylǵy testileý formatynda ózgerister joq ekenin aıta ketý kerek. Pánder sany ózgerissiz qalady, ıaǵnı úsh mindetti jáne eki beıindik pánder, barlyǵy 120 test tapsyrmasy. Onyń ishinde, Qazaqstan tarıhy – 20, oqý saýattylyǵy – 15, matematıkalyq saýattylyq – 15 jáne eki beıindik pán boıynsha 35 test tapsyrmasy usynylady. Eń joǵary upaı – 140. Testileýdiń jalpy ýaqyty – 4 saǵat (240 mınýt).
Shekti ball da ózgerissiz qaldy: «Quqyq» jáne «Pedagogıkalyq ǵylymdar» bilim berý salalary úshin keminde 75 ball, «Densaýlyq saqtaý jáne áleýmettik qamtamasyz etý (medısına)» keminde 70 ball, «Aýyl sharýashylyǵy jáne bıoresýrstar», «Veterınarııa» keminde 60 ball; ulttyq joǵary oqý oryndaryna túsý úshin keminde 65 ball, basqa joǵary oqý oryndaryna keminde 50 ball jınaý kerek.
Talapkerlerdiń yńǵaıy úshin UBT-nyń kúnin, ýaqytyn, orny men beıindik pánderin eske salatyn SMS-habarlama joldanady. Habarlama UBT-ǵa qatysýshylardyń ózderine, sondaı-aq kámeletke tolmaǵan testilenýshilerdiń ata-analaryna nemese zańdy ókilderine jiberiledi.
