«Sońǵy ýaqytta balalarǵa qatysty jazataıym oqıǵalar men fızıkalyq zorlyq-zombylyq qoldaný faktileri jıilep ketti, buǵan BAQ pen áleýmettik jelilerdegi jarııalanymdar, sondaı-aq ýákildiń atyna kelip túsken azamattardyń shaǵymdary dálel bola alady. Osyǵan baılanysty biz arnaıy keńes ótkizemiz, onda jeke balabaqshalardyń meńgerýshileri búldirshinderdiń qaýipsizdigin qamtamasyz etý úshin qandaı máselelerge nazar aýdarý kerektigi týraly aqparat alady», dedi Astana qalasy boıynsha Bala quqyqtary jónindegi ýákil Asıma Bımendına.
Jedel ýákil mektepke deıingi mekemelerde qaýipsizdikti qamtamasyz etý máselesinde saýatty qarym-qatynas ornatyp, orynsyz jaǵdaılardy ýaqytyly anyqtaý mańyzdy ekenin aıtty.
«Býllıng kezinde jedel áreket etý erejeleri, bilim berý uıymdaryndaǵy psıhologııalyq qyzmet erejeleri, qatygezdik pen zorlyq-zombylyq kezinde jedel áreket etý algorıtmi boıynsha qujattar bar. Bul nusqaýlyqtardy tárbıeshiler de, ata-analar da tolyqtaı bilýi kerek. Bul kez kelgen adam jazataıym oqıǵalardyń aldyn alý úshin jasaýy tıis alǵashqy qadam», dedi Asıma Bımendına.
Kezdesýde Astana PD ıývenaldy polısııa bóliminiń basshysy Nellıa Doshanova balalardy mektepke deıingi mekemelerde durys ustaý boıynsha praktıkalyq usynystarymen bólisti.
«Eń aldymen, kadrlardy irikteýge barynsha muqııat qaraý kerek. О́tinish berýshiniń jazbasyn ǵana emes, onyń qazirgi psıhologııalyq jaǵdaıy men otbasyndaǵy hal-ahýaldy da eskerý qajet. Tárbıeshilerdiń jumysyn sapaly baqylaý úshin balabaqsha basshylary beınebaqylaý kameralaryn jeke qaraýy qajet. Isti jasyryp qalý nemese ýaqytyly jetkizbeý faktileri bolmas úshin bul jumysty orynbasarlarǵa nemese tárbıeshilerdiń eshqaısysyna tapsyrýǵa bolmaıdy. Sonymen qatar, qyzmetkerlerdiń orynsyz minez-qulqyn ýaqytyly anyqtaý úshin kameralardy tek shaǵym bolǵan kezde ǵana emes, únemi qarap otyrý qajet.
Balalardyń emosıonaldy jáne fızıkalyq densaýlyǵyn muqııat baqylaý kerek. Balaǵa yqtımal qatygezdik týraly kez-kelgen jaǵdaıǵa jete mán berý qajet. Zorlyq-zombylyq faktisi týraly habarlaý - tek azamattyq ustanymnyń kórinisi ǵana emes, kásibı jaýapkershilik. Dóreki jaıt anyqtalǵan jaǵdaıda mektepke deıingi mekeme basshysynyń habarlamaýy ákimshilik quqyq buzýshylyq bolyp sanalady», dep eskertti Nellıa Doshanova.
Búgingi tańda Astanada 67 730 bala baratyn 507 mektepke deıingi bilim berý uıymy jumys isteıdi. Sonymen qatar, qalada mektep jasyna deıingi balalarǵa qatysty qatygezdik faktisi boıynsha 8 qylmystyq is tirkelgen.
