Tólegen Aıbergenov atyndaǵy №16 orta mektep dırektory Sáýle Ázimhanova ustazdar men oqýshylardy sońǵy qońyraý merekesimen quttyqtady. Atap ótetin erekshe jaıt, №16 mektepte alǵashqy qazaq synybynyń oqýshylary túlek atanyp jatyr.
«Búgin mektepte erekshe kún. 11 jyl oqytqan, tárbıelegen balalarymyzdy saltanatty merekemen shyǵaryp salaıyq dep otyrmyz. Árıne, meıirimdi, júregimen oılaıtyn, elimizdiń, jerimizdiń bolashaǵyna alańdaıtyn jaqsy azamattar shyǵarǵymyz keledi. Ár balamyzdy qımaı jatyrmyz. Ustazdar da qobaljyp júr.
Bıylǵy oqý jyly erekshe. Sebebi men osy mektepte birinshi jyl jumys istedim. Ustazdarymyzben jumyla jumys istedik. Áriptesterimniń barlyǵyn búgingi merekemen quttyqtaımyn. Azamatty tárbıeleý, júreginen oryn tabý – bul ustazdyń jumysy. Ustazdyń qyzmeti erekshe. Sondyqtan oqýshylar árkez bala kezinde qalyptasqan mektebi, synyby, otyrǵan partalary kóńilderinen ketpeýi kerek», dedi mektep dırektory.
Sáýle Myńshalqyzy qazir balalardyń erekshe, olar eń birinshi adamǵa qarap baryp, aıtqanyn isteıtinin aıtady.
«Bala tárbıeleý jumysy ońaı emes. Ol uzaq merzimde qalyptasatyn psıhologııalyq jumys. О́ıtkeni ár minezdi bir-eki kúnde, bir aıda qalyptastyrý múmkin emes, jyldap isteletin is. Birinshi balany tárbıeleıtin muǵalimderdiń qabileti myqty, is-áreketteri durys bolýy kerek», dedi ol.
Mektep dırektory urpaqtyń bolashaǵyna ustaz da, atana da birdeı at salysý keregin atap ótti.
«Osyndaı erekshe balalarymyzǵa ultymyzdyń qundylyqtaryn sińirý – boryshymyz. Al ata-ana osy jumysta bizge kómekshi bolýǵa tıis. Sebebi balanyń bolashaǵyna ustazdar tek jaqsylyq tileıdi», dedi Sáýle Myńshalqyzy.
