2020 jyly Prezıdent Qasym-Jomart Toqaev «Ańsaǵan cábı» ulttyq jobasyn jarııalaǵan bolatyn. Bul baǵdarlama boıynsha bedeýlikti ekstrakorporaldy uryqtandyrý (EKU) ádisimen emdeýge jyl saıyn 7 myń kvota bólinedi, sonyń arqasynda tek 2021 jyly elimizde 3 myńnan astam bala dúnıege kelip, osy balalardyń ata-analary perzent súıý baqytyna ıe boldy.
«Qazaqstandaǵy árbir altynshy erli-zaıypty bedeýlikke shaldyqqan. Resmı statıstıkaǵa sáıkes elimizde 21 myńnan astam adamǵa bedeýlik dıagnozy qoıylsa, ókinishke qaraı bul kórsetkish ósip keledi. Bar kúsh-qýatym men qabiletimdi bedeýlikke qarsy kúreske arnaǵan reprodýktıvti medısına salasynyń mamany retinde men úshin bul músin jaı ǵana sımvol emes. Bizdiń maqsatymyz – reprodýktıvti medısına salasyndaǵy zertteýlerdi, ınnovasııalardy qoldaý men damytýdyń mańyzdylyǵyna qoǵam nazaryn aýdarý. Sonymen qatar bedeýlik máselesine tap bolǵan erli-zaıyptylarǵa emosıonaldyq kómek pen janashyrlyq tanytý da mańyzdy», dedi músinniń ashylý saltanatynda «Ekomed» klınıkalar tobynyń negizin qalaýshysy jáne ǵylymı jetekshisi Saltanat Baıqoshqarova.
Osylaısha qola músin jańa tusaýyn kesken New Generation Clinic (NGC) halyqaralyq reprodýksııa ortalyǵy ǵımaratynyń qasbetine kórik berip tur. Aldyn ala josparlanǵanyndaı, ol reprodýktıvti medısına salasyndaǵy qajyrly eńbek pen jetistikterdi beıneleıdi. Ana alaqanyndaǵy sábıdiń beınesindegi bul kompozısııa reprodýktıvti densaýlyq salasyndaǵy ǵylymı jańalyqtar men ınnovasııalardyń mańyzdylyǵyn bildiredi. Músin – ana bolýdy armandaıtyn árbir áıeldiń qýaty men náziktiliginiń, senimi men batyldyǵynyń sımvoly.
Bizdiń elimizde reprodýktıvti tehnologııalardyń joǵary deńgeıde damýy Qazaqstandaǵy EKO ádisiniń negizin qalaǵan Saltanat Baıqoshqarovanyń altrýızmi, senimi men ıdeıasyna adaldyǵynyń arqasynda júzege asty. 1995 jyly 18 sáýirde ol «Ekomed» atty shaǵyn zerthananyń negizin qalap, 1996 jyly 31 shilde aıynda EKO ádisimen tuńǵysh qazaqstandyq qyz bala dúnıege keldi.
Ýaqyt óte kele shaǵyn zerthana adam reprodýksııasy klınıkalarynyń tobyna aınaldy, elimiz úshin bedeýlikpen kúresetin júzdegen zamanaýı maman daıyndady, búgingi tańǵa deıin klınıkada 20 myńǵa jýyq sábı dúnıege keldi.
Al «Ekomed» bedeýlikke qarsy kúreste úmit pen jeńistiń sımvolyna aınaldy. Ol búginde bilikti mamandar joǵary sapaly medısınalyq qyzmet kórsetetin №1 emhanaǵa aınaldy.
«Reprodýktıvti tehnologııalar úzdiksiz damyp keledi. Men «Ekomed» klınıkalar tobynyń Qazaqstan men Ortalyq Azııadaǵy ekstrakorporaldy uryqtandyrý salasyndaǵy kóshbasshyǵa aınalǵanyn maqtan tutamyn. Áý bastan-aq qazaqstandyq reprodýktıvti medısınaǵa sońǵy jańalyqtar men tehnologııalardy engizýdi maqsat etip qoıdym. Osylaısha, New Generation Clinic (NGC) zamanaýı halyqaralyq reprodýksııa ortalyǵyn iske qosý ıdeıasy dúnıege keldi. Bul álemdik standarttarǵa sáıkes jumys isteıtin, eń joǵary sanattaǵy qyzmet pen emdeýdi usynatyn ozyq jańa býyn klınıkasy. Munda Qazaqstanda alǵash ret jasandy ıntellekt arqyly bedeýlikti emdeýdiń eń zamanaýı ádisteri qoldanylýda», deıdi Saltanat Baıqoshqarova.
