Bilim berý salasyndaǵy sapany qamtamasyz etý Komıtetiniń tóraǵasy Ernur Daýenovtyń aıtýynsha, monıtorıng tek bilim basqarmalarynda ǵana júrgiziledi. Zerdeleý toby balabaqsha, mektep, kolledj jáne basqa da bilim berý uıymdaryna barmaıdy.
«Bilim basqarmalaryna monıtorıng júrgizýge muǵalimder nemese bilim berý uıymdarynyń dırektorlary tartylmaıdy. Barlyq bilim berý uıymdarynda jazǵy demalys bastaldy, muǵalimder bekitilgen kestege saı demalysqa shyǵa alady. Qorytyndy emtıhandardan keıin muǵalimderdiń eńbek demalysyna eshteńe kedergi bolmaýy kerek. Bilim basqarmalarynyń qyzmetin zerdeleý úshin barlyq baǵyttar boıynsha arnaıy krıterııler ázirlendi», deıdi Ernur Daýenov.
Aıta keteıik, monıtorıng barysynda mınıstrlik komıtetteri men departamentteriniń mamandary jáne onyń vedomstvolyq baǵynysty uıymdary óńirlerge ádistemelik kómek kórsetedi.
