Jetkinshek qyz oqıǵanyń mán-jaıyn ózi aıtyp berdi. Onyń aıtýynsha, belgisiz er adam ony qushaqtap, betinen súıgen.
- «Nur-Álı» degen qonaqúıge kirdik. Qonaqúı qyzmetkerine 2 000 teńge berip edi, ol bul aqsha tek 1 saǵatqa ǵana jetedi dedi. Keıin meni taksıde qushaqtap, betimnen súıdi. Maǵan onyń bul áreketi unamady. Dúkenge toqtap, maǵan tátti sýsyn men kámpıt taıaqshasyn alyp berdi. Biraq júrgizýshi aǵaıǵa aıtýǵa qoryqtym, - dedi qyz.
Anyqtalǵandaı, jetkinshek jazǵy lagerge barmaqshy bolǵan. Ony 36 jastaǵy kúdikti jetkizip tastaımyn dep taksıge otyrǵyzǵan.
Kýáger Kúlásh Teńelbaevanyń aıtýynsha, qyz er adamnan qorqyp turǵanyn baıqaǵan.
«Qyzdyń jaltańdap turǵanyn baıqadym. Onymen aqyryn sóılesý úshin úıge alyp kirdim. Sonda ekeýimiz qyzǵa talasyp qaldyq. Artymnan qalmaı júrip aldy», dedi kýáger.
Balam qurban bola jazdady degen anasy qazir del-sal kúıde. Onyń aıtýynsha, ákesi qyzyn únemi shyǵaryp salyp, taksıge ózi otyrǵyzyp jiberetin.
«Tańerteń saǵat 09:00-ge taman shyǵyp ketken. Sodan júregim sezdi me, bilmeımin, habarlasa bastadym. Áli kelmedi dedi. Balalarmen oınap qalǵan shyǵar dep oıladym. Mundaı jaǵdaıdy eshkimniń basyna tilemeımin. Osyndaı áreketke barǵan adam eń aýyr jazasyn alsyn», deıdi qyzdyń anasy Rımma Halmuratova.
Kúdikti adam urlaý faktisi boıynsha tergelip jatyr. Alaıda jábirlenýshiniń anasy qyzyn zorlaýǵa oqtalǵan dep qorqady. Sondyqtan tergeýdiń ádil ótýin qalaıtynyn jetkizdi.
