Otyrysty Májilistiń Ekologııa jáne tabıǵatty paıdalaný máseleleri jónindegi komıtetiniń tóraǵasy Edil Jańbyrshın ashty. Otyrysqa «ArselorMıttal Temirtaý» kompanııasynyń menedjmenti – tehnıkalyq dırektor K.Sımbal, Bas dırektordyń qaýipsizdik tehnıkasy máseleleri jónindegi orynbasary V. Voropaev, ekologııa jónindegi dırektor M. Qýantaeva jáne basqalar qatysty.
Jıyn barysynda «ArselorMıttal Temirtaý» AQ-nyń ekologııalyq, energetıkalyq jáne ónerkásiptik qaýipsizdik máseleleri qaraldy. 
- Bizdiń josparymyz – 2030 jylǵa qaraı shyǵaryndylardy 18 paıyz azaıtýǵa qol jetkizý, munda negizgi róldi óndiristi jáne domna úderisiniń otyn shyǵynyn ońtaılandyrý, JEO-ny aralas jáne gaz tárizdes otynǵa kóshirý, janý úderisin jaqsartý atqarady. Qazirgi iri jobalarymyz – eýropalyq ekologııa normalaryna sáıkes keletin jańa koks batareıalaryn salý. Jańa batareıalar ornatylǵannan keıin eskileri tolyq toqtaǵanǵa deıin óndiristen birtindep shyǵarylady. Biz koks gazyn tazartatyn jańa seh salyp jatyrmyz, birinshi qaıta óńdeý sehtarynda gazdy tazartý júıelerin jańǵyrtý jumystaryn júrgizýdemiz, №7 jańa qazandyqty paıdalanýǵa berý jobasy aıaqtalýǵa jaqyn, - dedi «ArselorMıttal Temirtaý» AQ tehnıkalyq dırektory Konstantın Sımbal. 
Kóshpeli otyrys aıasynda májilismender metallýrgııa kombınatyna bardy. Olar agloóndiristi, № 5 aglomashınadaǵy elektr súzgilerin, JEO-ny, qazandyq sehyn, tútin qubyryn, №3 qaldyq qoımasyn jáne kúljınaǵyshty, sondaı-aq qoj óńdeý ýchaskesin aralap kórdi.
Kóshpeli otyrys barysynda májilismender men kezdesýge qatysýshylar kótergen máseleler keńinen talqylandy. Basym máseleler – energııamen jabdyqtaý, JEO qyzmeti, ekologııalyq aspektiler jumys barysynda qaralý ústinde.
- Bizdiń perspektıvaly jobalarymyz –elektrfıltrlerdi ornatý jáne aglodomen óndirisinde gıbrıdtilerge deıin jańǵyrtý, konverterlik gazdy kádege jaratý jobasy, JEO qazandyqtaryn otyn tutynýdyń aralas túrine aýystyrý, jel generatorlaryn ornatý. Tehnologııalyq úderisti jaqsartý boıynsha – baıytý fabrıkalaryn iske qosý, janý prosesin jaqsartý jáne sý resýrstary men elektr energııasyn tutynýdy azaıtý. 
Zańnama talaptaryna sáıkes shyǵaryndylardy únemi baqylaý úshin kompanııada qazirdiń ózinde onlaın monıtorıngteý júıeleri bar jáne negizgi kózderde lastaýshy zattardyń jınalýyn baqylaý úshin jańa júıelerdi ornatý ústindemiz. Biz derekterdi tikeleı ekologııa departamentine testileýge berý úshin monıtorıng júıelerin qosýdyń qanatqaqty jobasyna qatysamyz, - dep qorytyndylady tehnıkalyq dırektor. 
