Onyń biri – oblystyq perınataldy ortalyq janynan qurylǵan «Qamqorlyq» erte emdeý ortalyǵy. Al, ekinshisi – aýtızm jáne basqa da mentaldi buzylýlary bar balalarǵa áleýmettik-medısınalyq qyzmet kórsetýge arnalǵan kúndiz jumys isteıtin ortalyq. Oblys ákimi baspasóz qyzmetiniń habarlaýynsha, bul ıgi iske áleýmettik mekemeler, oblys ákimdiginiń «Qamqorlyq» korporatıvtik qory, «Qazaqstan halqyna» qoǵamdyq qory, Nazarbaev qory jáne «Samruk Kazyna Trust» áleýmettik jobalardy damytý qoldaý kórsetken. Eki áleýmettik nysan da dárigerlerdiń medısınalyq qorytyndysy jáne medıko-áleýmettik saraptamanyń joldamasy boıynsha tegin qyzmet kórsetedi. Osy kúni ortalyqtardyń ashylý saltanatyna qatysqan oblys ákiminiń orynbasary Rýstam Álı qoǵamdyq qorlardyń ókilderine alǵys aıtty.
Oblystyq perınataldy ortalyqtyń dırektory Qanat Jumashevtiń aıtýynsha, oblystyq perınataldyq ortalyqtyń janynan neıro-ortopedııalyq buzylýlary jáne olardyń damý qaýpi bar balalarǵa em júrgizý mekemesin ashý isi qolǵa alynǵan. Atap aıtqanda, serebraldy paralıch, merziminen erte týǵan sábıler, Daýn sındromy, ortalyq nerv júıesi zaqymdanǵan basqa da syrqattary bar balalar em ala alady.
«Túrli erekshelikpen týǵan balalarǵa ýaqytynda em jasasa, densaýlyǵyn edáýir jaqsartýǵa múmkindik bar. Al kesh júrgizilgen emniń nátıje berýi qıyn. Sondyqtan erte bastan emdeıtin bul ortalyqtyń jumysy erekshe qajettiligi bar balalardyń densaýlyǵyn saýyqtyrýǵa oń yqpalyn tıgizedi dep oılaımyn», deıdi Q.Jumashev.
Munda 3 aıdan 3 jasqa deıingi balalardyń densaýlyǵy qadaǵalanady. Ortalyq aıyna 50 bala qabyldaı alady. Balalardyń ár 2-3 aı saıyn kelip, em qabyldaýyna jaǵdaı jasalǵan. Sebebi erte bastalǵan em úzdiksiz júrgizýdi qajet etedi. Oraıy kelgende, emdeý ornynda dıagnostıkalyq aýdıologııalyq tekserý jáne sońǵy úlgidegi mıdyń elektro ensefalogrammasy bar ekenin aıta ketkenimiz lázim. Munda arnaıy medısınalyq mamandardan nevrolog, reabılıtolog, LFK dárigeri, pedıatr, balalar ortopedi, sýrdolog dáriger, pedagogıkalyq quramnan defektolog, logoped, ergoterapevt, balalar psıhology mamandary jumys isteıdi.
Osy kúni aýtızm jáne basqa da mentaldi buzylýlary bar balalarǵa áleýmettik-medısınalyq qyzmet kórsetýge arnalǵan kúndizgi ortalyq ashylǵanyn aıttyq. Bul ortalyq 2 qabatty ǵımaratta ornalasqan. Osy qolaıly ǵımarat jergilikti bıýdjet esebinen satyp alynyp, oǵan jalpy somasy 200 mln teńgege kúrdeli jóndeý júrgizilgen. Al qajetti jabdyqtardy qorlar túgendegen. Ortalyq 125 orynǵa shaqtalǵan. Aýlada balalarǵa arnalǵan voleıbol, fýtbol alańdary bar. Sondaı-aq ortalyq sensorlyq, emdik dene shynyqtyrý kabıneti, defektologııa, mýzyka, fızıoterapııa, massaj, em-shara bólmesi, robototehnıka, logoped, konferensııa zaly, psıholog kabıneti, eńbekke baýlý, qysh qumyra jasaý bólmelerimen qamtylǵan.
Jetisý oblysy
