Ákege qarap ul ósetinin babatanym basynan boljaǵan. Osy máıekti sózden biz de ári asa almaı otyrmyz. Kishkentaıynan tulpardyń turysy men shabysynan qanattanǵan órimdeı ul ákesiniń qolǵabysy bola júrip, jylqynyń qasıetine qanyqqan.
«Es bilgeli ákem attyń mańaıynan alystatpaıtyn. 3 jasymnan bastap atqa minýdi úırendim. Birde aǵam maǵan taı syılady. Sol arqyly qyzyǵýshylyǵym oıanyp, alamannyń ómirimde erekshe oryn alatynyn túsindim», deıdi A.Qurmash.
Bala shabandozdyń aıtýynsha, jarystyń dýyna túsetin jylqyǵa erekshe kútim kerek. Sezimtaldyǵy sondaı, ózine degen mahabbatty, jylylyqty ańǵarady. Sondyqtan keıipkerimiz jylqylaryn erekshe qarap, jem-shóp, sýyn yqylaspen ýaqytyly berip, arnaıy jattyǵýlar jasatady. Saıystardaǵy san túrli ataq-abyroı, marapattyń bárinde úlken eńbek jatyr.
Jalpy, júlde alyp, halyqtyń qoshemetine kenelgen sátti Aqyljan sózben aıtyp jetkize almady. Erekshe sezimdi bastan ótkeretindigi kórinip tur. Bastysy eńbektiń ótemi oń istiń alǵa basqanyna erekshe qýanady. Jylqyǵa at qoıarda da aıryqsha mán beredi. Onyń júrisine, túsine, minezine qaraı qoıady. Máselen, «Aıqasqa» atyn syrtqy kelbetine qarap solaı dese, «Erkejırendi» qulyn kezindegi erkeligi úshin ataǵan.
Aqyljannyń jaqsy kóretin tulpary – «Baqtory». Ol búginde kópke málim, kómbeniń kórkine aınalǵan asyl tuqymdy jylqynyń tuıaǵy. Sol sebepti de atyn solaı qoıǵan. Keıipkerimiz ár báıgege tyńǵylyqty daıyndalyp, árqaısysynan júlde alýdy maqsat tutady. Bıyl da oljaly bolý úshin sáıgúlikterin baptap júr. Alda úlken dodalar kútip tur.
Jetisý oblysy
