Aıtalyq, «Qazaqtyń kórkem ádebıetin oqý arqyly minezimdi túzedim» deıtin zamandastar barshylyq. Olardyń kóbisi ádebı shyǵarmalardaǵy basty ári jaǵymdy keıipkerlerdi úlgi etedi. Qalamger sýrettegen keıipkerdiń boıyndaǵy jaqsy qasıetti kórgisi keledi, sondaı-aq qıynshylyqqa moıymaýdy, sabyrly, shydamdy bolýdy úırenedi.
Qazirgi tańda batystyń kitaptaryna suranys kóp, alaıda alystan dorbalamaı-aq ózimizde jatqan sandyq-sandyq baı muralarymyzdyń kózin ashyp, jańǵyrtyp, nasıhattap, laıyqty deńgeıde tutynsaq, naǵyz qazaqy tunyq tárbıeden nár alǵan bolar edik.
Jaqsy shyǵarma ǵana oqyrmannyń júregine izgi qasıettiń dánin seýip, adam janyn tárbıeleı alady.
Búginde jastardyń deni «Qosh bol, qıyndyq!», «Men jáne aqsha», «Baıý ǵylymy», «О́mirge sheksiz ǵashyq» «Baı áke, kedeı áke», «Eń baqytty áıel», «Kúnkóristen ket, baılyqqa jet» degen syndy kitaptardy oqıtynyna qarap, kórkem ádebı týyndylar motıvasııalyq, psıhologııalyq, qarjylyq saýat ashý, taǵy basqa da baǵyttarda jazylǵan kitaptardan keıingi orynda turǵanyn túsinesiń. Jastardyń atalǵan baǵyttaǵy kitaptarǵa áýes bolýynyń sebebi kóp. Biri álgi kitaptar depressııadan shyǵarady dese, taǵy biri qarjylyq qıyndyqtardan, basqa da sátsizdikterden qutqarady dep esepteıdi. Ekinshi bireýler ınstagramda «attandaǵan» blogerlerdeı ómir súrýdi, solar sekildi qydyrý, kıiný, tamaq ishýdi ómirlik murat sanap, osy oraıdaǵy aqyl-keńester jazylǵan álgindeı kitapsymaqtarǵa qumar keledi.
Iá, baılyqqa jetýdiń, depressııadan shyǵý jolyn izdestirýdiń, jaıly ómirge umtylýdyń esh aıyby joq shyǵar, biraq bul rýhanı kemeldikke bastaıtyn jol, amal emes.
Osy oraıda ómirdiń mánin baılyq pen toqtyqtan izdeıtin jastar rýhanı jutańdyqqa dýshar bolmasa eken deısiń. О́ıtkeni jastar «er jigit eli úshin týady, eli úshin óledi» dep, «ultymnyń bir qajetine jarasam» dep, jalyndap tursa kerek-ti.
Shynynda, búginde kóp jastyń bolmashyǵa kúızelip, synyp qalatyny, psıhologııalyq turǵyda álsiz bolýy ómirdiń máni rýhanı baılyqta jatqanyn uqpaı, oǵan qaraı umtylmaýynda jatyr. Al rýhanı baılyq, tolymdy tárbıe, myqty azamat bolyp qalyptasý dárisiniń qaınary qazaqtyń kórkem ádebıetinde burqyldap qaınap jatyr emes pe. Sondyqtan qazaq ádebıetiniń qudiret-kúshine, áleýetine ıek artyp ósý, jetilý barsha jastarǵa mindet bolýy kerek. Sonda ǵana jastarymyz qaltasy qalyń bolǵanymen, keýdesi qýys bireý emes, eli súıip, jurt ardaqtaıtyn abzal adam bolyp qalyptasady.
Tumar QAIRATQYZY,
L.N.Gýmılev atyndaǵy
EUÝ stýdenti
