«Qazaqstan Germanııanyń, tipti búkil Eýropa elderiniń ındýstrııasyna qajet tabıǵı resýrstardy ıgerýde senimdi seriktes bolýǵa daıyn. Búgin tańerteń Shtaınmaıer myrzamen kezdesý barysynda tabıǵı resýrstardy birlesip barlaý jáne ıgerý isindegi yntymaqtastyǵymyzdy nyǵaıtýǵa kelistik. Bul Shıkizat, ónerkásip jáne tehnologııa salalaryndaǵy seriktestik týraly úkimetaralyq kelisimge tyń serpin beredi», dedi Prezıdent.
Sondaı-aq ol kólik jáne logıstıka salalarynda múmkindiktiń mol ekenin aıtty.
«Qazaqstan Eýrazııanyń júreginde ornalasqan. Munyń strategııalyq máni zor. Qytaı men Eýropa arasyndaǵy barlyq qurlyqtyq júk tasymalynyń 80 paıyzy bizdiń elimizdiń aýmaǵy arqyly ótedi. Qazirgi jańa geosaıası jaǵdaıda «Orta dálizdiń» mańyzy arta tústi. Bul – Ortalyq jáne Shyǵys Azııadan Eýropaǵa júk tasymaldaýdyń eń qysqa ári turaqty baǵyty.
2022 jyldan bastap Kaspıı dálizi arqyly Eýropalyq Odaqqa múshe elderge tasymaldanatyn júk kólemi eki ese artty. Shyǵys pen Batys arasyndaǵy ulǵaıyp kele jatqan saýda kólemine qoldaý kórsetý úshin biz ınfraqurylymdy jańartý jáne kedergilerdi joıý jumystaryn júrgizip jatyrmyz», dedi Memleket basshysy.
Onyń aıtýynsha, qazaqstandyq porttardyń ótkizý múmkindigi aldaǵy ýaqytta 30 mıllıon tonnaǵa deıin artady.
«Biz EýroOdaqtyń «Jahandyq qaqpa» bastamasy men bizdiń ulttyq deńgeıdegi kúsh-jigerimizdiń sınergııasyna senemiz. Bizdiń resýrsymyzdan bólek, naqty jobalar EQDB, EIB jáne KfW nemis damý banki arqyly da qarjylandyrylýy múmkin. Erteń Shtaınmaıer myrza Kaspıı teńiziniń jaǵasyndaǵy Mańǵystaý oblysyna baryp, osy Transkaspıı halyqaralyq kólik baǵytynyń zor áleýetin óz kózimen kóredi», dedi ol.
