Ideologııalyq sheshimder aıqyndaldy

Elimizdiń ulttyq biregeıligi men qundylyqtaryna arnalǵan Túr­kistandaǵy ekinshi Ulttyq quryltaıda Memleket basshysy Qasym-Jomart Toqaev jańa bolmysty ornyqty­rýǵa baılanysty strategııalyq usta­nymdardy aıtty.

Ulttyń jańa bolmysyn qalyp­tas­tyryp, damytý jolynda óskeleń urpaqtyń boıynda adamgershilik, bilimpazdyq, eńbekqorlyq sııaqty qasıetterdi Temirqazyq etý ózekti. Memleket basshysy dızaın kod arqyly memlekettik nyshandardy jetildirý, ultymyzdyń tarıhı sanasyn jańǵyrtý, mádenı muramyzdy saqtap, nasıhattaý baǵyt­taryn erekshe aıtyp ótti. Osyǵan baılanysty qaıtalanbas qasterli tarıhymyzdyń kóptomdyq jınaǵyn keler jyly aıaqtaýdy tapsyrdy. Ol barsha azamattarymyz úshin oqýda óte tartymdy bolýy shart ekendigine toqtaldy. «Baıbarys» ordenin engizý týraly usynys jasady.

Prezıdent Qasym-Jomart Toqaev Quryltaıda jas býynnyń tár­bıesine baılanysty da qundy oılaryn jarııa etti. «Táýelsiz Qazaqstanda rýhy azat, kózi ashyq, kókiregi oıaý urpaq ósip keledi. Olar ǵylym-bilim, mýzyka, kıno, sport jáne basqa da salalarda tabysqa jetip, búkil álemge tanymal bola bas­tady. Jastarymyz týǵan jerdiń qaıtalanbas ereksheligin jáne týǵan eldiń biregeı bolmysyn jer júzine tanytyp júr», dep jastardyń boıyndaǵy patrıottyq sezimderiniń róline erekshe mán berdi.

Búgingi jastar – ultymyzdyń er­teńgi bolmysy. Sondyqtan bala­la­ry­myzdyń adal, tárbıeli, bilimdi, de­n­saýlyǵy myqty, sanaly da salamatty eńbekke degen qulshynysy joǵary azamat bolyp qalyptasyp, adamgershi­lik jáne moraldyq qabi­letteri damýy asa mańyzdy. Osy jol­da ata-analar qoǵamdastyǵy, mektep jáne búkil qoǵam bolyp tárbıe jumysyn jetildirýge kúsh salýymyz qajet. Memleket basshysy Qasym-Jomart Kemeluly tár­bıe jumysynyń basymdyǵyn aıqyn­daı otyryp, «Balalar kitaphana­sy» atty jańa baǵdarlamany oryndaýdy tapsyrdy. Memlekettik basqarý tetigindegi jańa baǵyttardy júıeli da­mytý, aqparat saıasatynyń tıim­dili­gin arttyrý, kreatıvti ındýs­trııa­nyń ınnovasııalyq tehnologııalaryn damytýdaǵy rólin, memlekettik saıasat­ta taldaý, saraptama jasaý qyzmetin sapaly júrgizýge baılanysty júıeli ádis-tásilderdi damytý qajettiligin atap ótti.

Prezıdentimiz kitaptar men basylymdardy – ıdeologııanyń negizgi baǵyt­­­tary retinde aıqyndady. Jazý­shy­­lar odaǵynyń erekshe róline toqtaldy. Sondaı-aq 24 saǵat jumys isteıtin Prezıdent kitap­­hanasyn ashý qajettigi týraly aıtty.

Aýyl mek­tep­te­riniń damýyn bilim salasynyń naqty strategııalyq baǵyty retinde aı­qyndady. Shekara mańyn­daǵy aýyl­dar­dyń áleýetin arttyrýda Katonqara­ǵaı, Marqakól, Maqanshy aýdandaryn qalpyna keltirý týraly bastama kóterdi.

Ulttyq quryltaı elimizdiń en­di­gi damýyna jańa ıdeologııalyq ne­giz bolar sheshimder aıqyndalǵan jıyn boldy. Prezıdent egemen eli­miz­di nyǵaıtýǵa usynǵan baǵdaryn ornyq­tyrý jolynda úles qosýǵa daıar eken­i­mizdi atap ótemin. Barlyq qoǵam ókil­in osy jolda tabandy eńbek etý­ge shaqyramyn.

Juldyz SÚLEIMENOVA,

Májilis depýtaty