Ulttyq quryltaıdyń tarıhı mańyzy zor aımaqtarda ótýi – ejelgi dástúrdiń jańǵyrýy. Túrkistanda eldik máseleler qozǵalyp, naqty sheshimder qabyldandy.
Tarıhymyzda ult ustyndarynyń Kúltóbe, Mártóbe men Ordabasyda jınalyp, keńes qurǵany belgili. Byltyr Ulytaýda bastalyp, araǵa jyl salyp Túrkistanda jalǵasyn tapqan Ulttyq quryltaı sátti ótti.
Prezıdent óz sózinde «Ábish Kekilbaev «Qazaq rýhynyń qaǵbasy», dep ataǵan Ordabasy osy jerge tıip tur. Osynaý áıgili tóbelerde halqymyzdyń ıgi jaqsylary san ret bas qosqan. Bolashaqta da osy mártebeli mıssııasyn atqara beredi», dep bul isterdi úılestirý mindeti men jaýapkershiligi óńirdi basqarýshy azamattarǵa júkteletinin basa aıtty. Sondaı-aq Qoja Ahmet Iаsaýı kesenesine ulttyq mádenı-tarıhı eskertkish mártebesin berý týraly engizilgen usynysty qoldaıtynyn bildirdi.
Memleket basshysy Ulttyq quryltaıdyń ekinshi otyrysyna «Ádiletti Qazaqstan – Adal azamat» ataýdyń berilý máni bar ekenin atap ótti. «Ádiletti Qazaqstan» men adal qyzmet etý – egiz uǵym. Jýyrda oryn alǵan zardaby mol oqıǵany tilge tıek etip, biz úshin sabaq bolǵanyn jetkizdi. Aýyr synaqtardy tek birlik arqyly jeńetinimizdiń taǵy bir aıǵaǵy boldy.
Azamattardyń sana-sezimi jańǵyrmaı reforma nemese bastamany iske asty deý beker ekenin de sóz etti. Rasymen azamattardyń dúnıetanymy, ustanymy men pıǵyly bir arnada toǵyspasa jáne ózgermese nátıje kútý de bos sóz. Memleket pen qoǵam ortaq iske jumylǵanda ǵana ómirsheń ıdeologııa qalyptasa bastaıdy.
Q.Toqaev ortaǵa salǵan máseleler jáne negizgi baǵyttardy sheshimderimen birge málimdedi. Eń áýeli memlekettik nyshandardyń alar ornyna toqtalyp, aımaqtyq nyshandardy birkelki etip retke keltirýdi tapsyrdy. Memlekettik nagradalardy berýde halyqtyń yqylasy eskerilip, tarıhı tulǵalarymyz Ál-Farabı, Abaı, Ahmet Baıtursynuly atyndaǵy syılyqtar beriledi. Respýblıkada endi «Eńbek kúnine» oraı eń úzdik mamandar memlekettik deńgeıde ulyqtalady.
Prezıdent Qoja Ahmet Iаsaýıdiń týǵanyna 930 jyl tolýyna oraı, «Iаsaýıtaný» ǵylymı ortalyǵyn nemese ınstıtýtyn qurý bastamasyn kóterdi. Bul sheshim ǵulamanyń túrki halyqtaryna qaldyrǵan eńbegine jasalatyn qurmet dep esepteımin. Jaǵymdy jańalyq munymen bitken joq. Prezıdent jaqynda Maral ıshannyń Kenesary hanǵa syılaǵan Qurany tabylǵany týraly aqparatpen bólisti. Eki ǵasyr boıy qoldan-qolǵa kóshken Quran qalpyna keltirilgen soń Qoja Ahmet Iаsaýı kesenesine qoıylǵany jón degen baılamǵa kelipti. Memleket basshysy: «Bul oqıǵa Qazaqstannyń jańa dáýiriniń berekeli bastaýy bolsyn dep tileıik», dep jaqsy yrymǵa balady.
Qazaqstanda buǵan deıin túrli sporttyq olımpıadalar ótti. Degenmen ulttyq sportty nasıhattaıtyn jarystar uıymdastyrylmaǵan edi. 2024 jyly elimizde V Dúnıejúzilik kóshpeliler oıyndary ótedi. Bul saıysqa Túrkistan oblysynyń sportshylary qatysady.
Ulttyq quryltaıda aqparattyq saıasat, kıno óndirisi, arhıv isi, balalar kitaphanasy baǵdarlamasy, shekaralas aýdandardy qalpyna keltirý jáne aýyldardy damytý jaıynda tapsyrmalar júkteldi. «Prezıdent – áýlıe emes, halyqtan bıik tulǵa emes», degen Q.Toqaev ózin madaqtaýdan góri memleket pen halyq múddesi úshin adal qyzmet etý kerektigin eskertti.
Beısen TÁJIBAEV,
Túrkistan oblysy ákiminiń orynbasary
