Qaıyrymdylyq is-sharasynda 1000-nan astam otbasyǵa azyq-túlik sebeti úlestirildi. Azyq-túlik jıyntyǵyn taratýda eriktiler men belsendi azamattar kómek kórsetip jatyr. Qalalyq Din isteri jónindegi basqarma basshysynyń aıtýynsha, elordada toqsan saıyn muqtaj jandarǵa kómek kórsetiledi.
«Qala ákimdigi jyl basynda Qazaq oil-men memoramdýmǵa otyryp, toqsan saıyn muqtaj jandarǵa kómektesýdi kózdep otyr. Osy joly azyq-túlik sebetiniń janyna qurbandyqqa shalynǵan mal etiniń bir bóligin qosyp beremiz. Qurban etteriniń úshten bir bóligin elorda turǵyndary, onyń ishinde muqtaj jandarǵa taratý kózdelgen edi. Turǵyndar tizimi qalalyq jáne aýdan ákimdikterine túsken ótinishter boıynsha jasalady. Mundaı saýapty iste kómektesip júrgen barlyq jandarǵa alǵys bildiremin. Qurban aıt meıramy qutty bolsyn!», dedi basqarma basshysy Nurdáýlet Álmuhanov.
Aıta ketsek, elordada 180 myńnan asa áleýmettik az qamtylǵan otbasy bar. Bıyl osy sanattaǵy 4 myń otbasyǵa azyq-túlik sebetin tapsyrý josparlanǵan. Igi istiń basy-qasynda júrgen qala ákiminiń keńesshisi Qýanysh Moldabek óz sózinde sońǵy 4 jylda osyndaı 30-ǵa jýyq qaıyrymdylyq is-sharasy ótkizilgenin aıtty.
«Búgingi is-shara dástúrli «Igi ister» marafony aıasynda ótip jatyr. Sebette áleýmettik mańyzdy azyq-túlik pen úı sharýashylyǵyna qajetti zattar bar. Bir qorap shamamen 40 kelige teń. 2019 jyldan beri 30-ǵa jýyq osyndaı ıgi is jasaldy. Osy oraıda barlyq elorda turǵyndaryn qaıyrymdylyq jasaýǵa shaqyramyn. Qurban aıt barshamyzǵa qutty bolsyn!», dedi qala ákiminiń keńesshisi.
Azyq-túlik sebetteri tizimdegi mekenjaılar boıynsha taratylady. Elordaǵa 2008 jyly Leńgirden kóship kelgen Gúlbına Kósherbaeva qaıyrymdylyq jasap júrgen barlyq jandarǵa alǵys aıtty.
«Bizge kómek qórsetip jatqandaryńyzǵa óte qýanyshtymyz. Meniń 5 balam bar. Úıde joldasym ǵana jumys isteıdi. Bul azyq-túlik sebeti bizdiń otbasymyzǵa úlken kómek. Qazir bir keli qanttyń ózi 625 teńge turady. Qymbatshylyq zamanda azyq-túlikke kóp aqsha ketedi. Qazir úı kezeginde turmyn. Bizge kómektesip jatqan qala ákimdigi, odan keıin Baıqońyr aýdan ákimdigi men eriktilerge alǵysymdy aıtamyn!», dedi Gúlbına Kósherbaeva.
