Qaznette shaı toksınderin qalaı anyqtaý kerektigi beınelengen rolık tarap júr. Qurǵaq qaınatpaǵa azdap sý quıylady, sodan keıin ony sarǵysh-qońyr túske boıalǵan qaǵaz paraǵyna ysqylaıdy. Avtor mundaı shaı densaýlyqqa qaýipti ekenin aıtyp, tipti qaterli isik týdyrady degen qorytyndy jasaǵan.
Beınejazbanyń sıpattamasyna qaraǵanda, shaı Pákistanda óndirilgen jáne onyń quramynan hımııalyq boıaǵyshtar tabylǵan. Aıta ketý kerek, Qazaqstanda Pákistan shaıynyń keıbir markalary Keden odaǵynyń tehnıkalyq reglamentteriniń talaptaryna sáıkes kelmeýine baılanysty tyıym salyndy. Sebebi olardyń quramynan sıntetıkalyq boıaǵyshtar tabylǵan. Alaıda beınede kórsetilgen shaı tyıym salynǵan ónimder tiziminde bolmaǵan.
«Vıdeodaǵy shaıdyń Pákistanǵa eshqandaı qatysy joq. Iri marketpleısterdiń birinde siz ónimniń qaptamasynyń fotosýretterin ártúrli dúkenderden taba alasyz. Olardyń birinde Kenııada shaı óndirilgeni, al Qazaqstanda, Almaty oblysy Qarasaı aýdany Kókózek aýylynda qaptalǵany anyq kórinedi. Sondaı-aq qaptamada shaıdyń quramy kórsetilgen. Onda sıntetıkalyq boıaǵyshtar joq. Shaıdyń ózinen basqa, quramynda apelsın men greıpfrýt bar», dep túsindirdi Stopfake.kz.
Aıta ketsek, shaıdyń boıaǵysh qasıetteri qandaı da bir toksınniń bar ekenin bildirmeıdi. Shaı quramynda karotın, teaflavın jáne tearýbıgın bar, olar qaǵazdy jáne basqa aq zattardy boıaýǵa qabiletti. Sońǵy ekeýi shaı japyraǵyn ashytý prosesinde paıda bolady. Olar altyn sary jáne qyzyl-qońyr reńkter beredi.
