Bas konsýldyq jumysy Qazaqstan Respýblıkasynyń óńirleri men kásiporyndarynyń Reseı Federasııasy óńirlerimen saýda-ekonomıkalyq jáne mádenı-gýmanıtarlyq yntymaqtastyǵyn keńeıtýge, sondaı-aq tıisti konsýldyq qyzmetterdiń qoljetimdiligin arttyrýǵa baǵyttalǵan.
Jańa dıplomatııalyq nysannyń jumysy Oral federaldy okrýginiń búkil aýmaǵyn, atap aıtqanda Sverdlov, Chelıabi, Qorǵan, Túmen oblystaryn, sonymen qatar Perm ólkesin qamtıdy. Jalpy osy konsýldyq okrýgtiń aýmaǵynda 90 myńnan astam qazaq, onyń ishinde Qazaqstannan kelgen 7 myńnan astam stýdent bar.
Ákimshilik ortalyǵy jáne eń úlken qalasy Ekaterınbýrg bolyp tabylatyn Oral federaldy okrýgi – Reseı Federasııasynyń qarqyndy damyp kele jatqan ónerkásip, ǵylym-bilim, kólik-logıstıkalyq jáne qarjy ortalyqtarynyń biri. Munda iri ǵylymı jáne óndiristik birlestikter ornalasqan. О́nerkásiptik óndiristegi ekonomıkalyq qyzmettiń negizgi túrleri joǵary ǵylymı-tehnıkalyq áleýeti bar mashına jasaý jáne metall óńdeý ónerkásibi bolyp otyr.
Saltanatty rásim kezinde Úkimet basshysy Álıhan Smaıylov pen Sverdlov oblysynyń gýbernatory Evgenıı Kýıvashev qyzyl lentany qıyp, artynsha Bas konsýldyqtyń ǵımaratyn aralady.
Premer-mınıstrdiń aıtýynsha, Oraldyń qaq ortalyǵynda Bas konsýldyqtyń ashylýy bizdiń dostyq qarym-qatynastarymyzdyń damýyna eleýli serpin beredi.
Sonymen qatar Úkimet basshysy 10 jyl buryn Ekaterınbýrgte eki el prezıdentteri qol qoıǵan HHI ǵasyrda tatý kórshilik pen odaqtastyq týraly shart aıasynda strategııalyq áriptestikti odan ári nyǵaıtý sharalary belsendi jalǵasyp kele jatqanyn atap ótti.
«Búginde Qazaqstannyń oblystary men qalalarynyń Reseı sýbektileriniń kópshiligimen turaqty dıalogy ornatylǵan. Bul turǵyda Oral aımaǵy geografııalyq jaqyndyǵy jaǵynan da, ónerkásibi damyǵan Sverdlov, Qorǵan, Túmen, Chelıabi oblystarymen jáne Perm ólkesimen qalyptasqan saýda-ekonomıkalyq baılanystar jaǵynan da óte mańyzdy», dedi Álıhan Smaıylov.
Sóz sońynda Premer-mınıstr QR Bas konsýldyǵy memleketaralyq yntymaqtastyqty damytý úshin jańa múmkindikter ashatynyna senim bildirip, onyń qyzmetkerleriniń jumysyna tabys tiledi.
