«Búgin biz Elordany damytýdyń ózekti máselelerin talqylaý úshin jınalyp otyrmyz. Bıyl bas qalamyzdyń qurylǵanyna 25 jyl toldy. Astana shırek ǵasyr ishinde zamanaýı iri qalaǵa aınaldy. Kóp jumys atqaryldy. Jetistikterimiz az emes. Elorda kún sanap ulǵaıyp kele jatyr. Turǵyndar sany aıtarlyqtaı kóbeıdi. Aldaǵy jyldary qala halqynyń sany 1,5 mıllıonǵa jetedi degen boljam bar. Budan da kóp bolýy ábden múmkin. Biraq, qalanyń bas josparynda bul jaǵdaı tolyq eskerilmegen.
Árıne, qalanyń qarqyndy damyǵany jaqsy. Degenmen, qazir osy úrdis áleýmettik ınfraqurylymǵa zor salmaq túsirip otyr. Áli kúnge deıin sheshimin tappaı kele jatqan máseleler bar. Muny jurt bilip otyr. Sondyqtan, Úkimet te, ákimdik te sonyń bárin sheshý úshin jumyla jumys isteýi kerek. Bul jumysqa qoǵam ókilderin tartý qajet», dedi Prezıdent.
Memleket basshysy Astanany kórkeıtý, turmys sapasyn jaqsartý – barlyǵyna ortaq mindet ekenin atap ótti.
«Biz qańtar aıynda arnaıy keńes ótkizip, biraz máseleni talqyladyq, maqsat-mindetterdi aıqyndadyq. Sodan beri jarty jylǵa jýyq ýaqyt ótti. Endi atqarylǵan jumystarǵa toqtalamyz», dedi Prezıdent.
Memleket basshysynyń aıtýynsha, mereıtoı – qol jetkizgen jetistikter men jarqyn jeńisterge ǵana emes, jiberilgen qatelikter men múmkindikterge de nazar aýdaratyn mańyzdy beles.
«Jiberilgen kemshilikterden sabaq alyp, tıisti qorytyndy shyǵarý mańyzdy. Qazir bosańsıtyn jáne jetistikterge toqmeıilsıtin ýaqyt emes. Básekege toly kúreste jetistigine masattanbaı, ózin-ózi shyńdap, alǵa qadam basqandar jeńiske jetedi.
Búgingi jıynnyń mán-mańyzy da – osy. Astana – elimizdiń iskerlik, saıası jáne mádenı ortalyǵy. Elimizdiń barlyq aımaqtary elordaǵa qarap boı túzeıdi, damıdy. Astana kóptegen salada, sonyń ishinde azamattardyń ómir súrý sapasy boıynsha da basqa qalalarǵa úlgi kórsetedi. Sondyqtan, qalanyń turaqty damýyna kedergi bolyp jatqan túıtkilderdi sheshý úshin memlekettik organdar tııanaqty jumys isteýi qajet», dedi Q.Toqaev.
