Tilsiz jaý Oral qalasynda, sondaı-aq Aqjaıyq, Terekti, Syrym, Bórli, Qaztalov jáne Báıterek aýdanynan shyqqan. Terekti aýdanyndaǵy Ábdirahman Áıtıev atyndaǵy aýylda bolǵan órttiń qaýiptiliginen 10 úıdiń turǵyndary ýaqytsha kóshirildi. Oqıǵa ornyna Batys Qazaqstan oblysynyń ákimi Narıman Tóreǵalıevtiń ózi baryp, tótenshe jaǵdaıdy kózimen kórdi. Barlyq arnaýly kúshter men mamandar jumylyp, úılesken qımyldyń arqasynda mal-jan, turǵyn úıler aman qaldy. Túngi saǵat 00.40-ta aýyldaǵy órt tolyq sóndirildi, 44 adam úıine oraldy. Osy oqıǵanyń saldarynan 26 ga memlekettik orman qory jáne 24 ga qurǵaq shóp janyp ketti.
Oral qalasynyń ózinde úıirile soqqan qatty jeldiń áserinen aǵashtar qulap, elektr jelisine zaqym kelgen. Jergilikti ýaqyt 14.15-te 10 m/s jeldiń ekpini Oral qalasynyń jeke úıler ornalasqan sektory ishinara zardap shekti. Barlyǵy 800-ge jýyq jeke úı, onyń ishinde Derkól kenti, Jelaevo kenti, Kóne áýejaı shaǵyn aýdany, 2-jumysshy, ortalyq bazar aýmaǵy (barlyǵy 1 898 jeke turǵyn úı) jartylaı jaryqsyz qaldy. Batys Qazaqstan AEJK JShS kúshimen (40 adam jáne 10 adam) kezeń-kezeńimen qosylyp jatyr.
Oblystyń ár jerinde shyǵyp jatqan órttiń basym kópshiligi dala órti, qurǵaq shóptiń janýy bolyp tur. Oqıǵa bolǵan jerlerge arnaıy toptar jiberilip, apattyq-qutqarý jumystary jasaldy.
Qazir Batys Qazaqstan oblystyq Tótenshe jaǵdaılar departamentiniń bazasynda jedel shtab ashylǵan. Onyń quramynda barlyq kommýnaldyq qyzmet bar. Osylaısha, oblystaǵy barlyq aqparat saralanyp, jaǵdaı baqylanyp otyr. Shekaralyq aımaqtarda reseılik tótenshe jaǵdaı arnaıy qyzmetterimen habar almasýda.
Keshe keshkisin eń kúrdeli jaǵdaı Terekti aýdanynyń Qumaqsaı aýylynda bolǵan edi. 25 gektar alqapty sharpyǵan órt ormanǵa aýysyp kete me degen qaýip bolǵan. О́rt sóndirýshiler jumyla qımyldap, der kezinde órtti oqshaýlady. Shamamen 25 ga alqap otqa oranǵan. Oqıǵa ornynda jergilikti atqarýshy mekemeler, erikti órt sóndirýshiler qurylymy, TJD, «Qazavtotrevel» mekemesinen shamamen 50 adam, 15-ten asa tehnıka bolǵan.
Aýa raıyn boljaý mekemeleri Batys Qazaqstan oblysy boıynsha 10 shilde kúni de daýyldy eskertý jarııalady: 10 shildede 35-39 gradýsqa qatty ystyq saqtalady. 10-11 shildede oblystyń ońtústiginde, shyǵysynda órt qaýpi joǵary. Ońtústik, ońtústik-shyǵysynda kúndiz jel ekpini 18 m/s. qatty ystyq 37-39 gradýs bolady. Qazirgi ýaqytta oblys boıynsha jaǵdaı kúrdelene túsýde, janý men órttiń barlyq faktisi Tótenshe jaǵdaılar departamentiniń erekshe baqylaýynda.
Joǵaryda aıtylǵandaı, jaǵdaıdy oblys basshysy da qadaǵalap otyr. 10 shildege qaraǵan túngi saǵat 02.30-da Tótenshe jaǵdaı departamentinde qurylǵan jedel shtabta Narıman Tóreǵalıev Qaztalov, Tasqala, Aqjaıyq jáne Syrym aýdandary aýmaǵynda oryn alǵan órtti aýyzdyqtaý boıynsha úılestirý jınalysyn ótkizgen.
«Jergilikti atqarýshy organdar men órt sóndirýshiler 24/7 rejiminde jumys isteýde. Iri órt oshaqtary bar aýdandardyń basynda bir orynbasarym jáne Tótenshe jaǵdaı departamenti basshysy jumystanýda. О́rtti lokalızasııalaýǵa departament kúshterinen bólek sharýa qojalyqtary, jergilikti aýyl turǵyndary qol ushyn berip jatyr.
...Osyǵan oraı, qaýipsizdik erejelerin qatań saqtaýdy suraımyn: jol jıegine temeki tuqylyn tastamańyz, tabıǵat aıasyna demalys kezinde ot jaqpańyz, óte qatty ystyq kúnderi shóp shabý jumystaryn ýaqytsha toqtatyp, shópti tasymaldaǵan kezde tek ushqyn ustaǵyshpen jabdyqtalǵan tehnıkany paıdalanyńyz!», degen úndeý taratty oblys ákimi.
Batys Qazaqstan oblysynda jıilep ketken órtti sóndirý úshin kórshiles Aqtóbe oblysy Tótenshe jaǵdaılar departamentinen 32 adam men 5 tehnıka jolǵa shyqty, dep habarlaıdy Tótenshe jaǵdaılar mınıstrligi baspasóz qyzmeti.
Dala órtin jedel sóndirý úshin Astanadan «Qazavıaqutqarý-875» tikushaǵy da ushyp shyqqan.
Batys Qazaqstan oblysy
