О́ńirde densaýlyq saqtaý, pedagogıka, din, mádenıet jáne qurylys salalary boıynsha maman tapshy. Ásirese dáriger mamandar jetispeıdi. Oblystyq densaýlyq saqtaý basqarmasy basshysynyń orynbasary Gúlnár Abdrahmanovanyń aıtýynsha, dál qazir oblysta 247 maman-dárigerdiń orny bos tur. Sonyń ishinde jalpy tájirıbelik dárigerler, anestezıologter, akýsher-gınekologter jetispeıdi.
Árıne, óńirdi qajetti mamandarmen qamtamasyz etý úshin jan-jaqty, josparly sharalar júrgiziledi. Sonyń biri – jergilikti bıýdjet qarajaty esebinen bilim berý granttaryn taǵaıyndaý. Jergilikti bıýdjet qarajaty esebinen óńirdegi túrli basqarmalardyń suranysyn eskere otyryp, 2017 jyly – 190 grant, 2018 jyly – 96 grant, 2020 jyly – 48 grant, 2021 jyly – 90 grant, 2022 jyly 114 grant bólingen eken.
– 2023 jylǵa bilim granttaryn belgileýge bizdiń basqarma oblys boıynsha qajetti mamandyqtarǵa tapsyrys jınaqtady. Qazirgi tańda qajettilik 86 «bakalavr», 55 «rezıdentýra», barlyǵy 141 mamandy qurap otyr, – deıdi oblystyq bilim basqarmasynyń basshysy Aıgúl Myńbaeva. Bul granttardyń 60-y – medısına salasyna, 10-y – matematıka pániniń muǵalimi, 3-ýi – logoped-pedagog, 3-ýi – tıflopedagog, 3-ýi – sýrdopedagog, 3-ýi – olıgofrenopedagog mamandyǵyna, 4-eýi qurylys salasyna berilmek.
Árıne, bul memlekettik bilim grantyna qol jetkize almaı qalǵan túlekter úshin ájeptáýir kómek. Bul grantqa kópbalaly nemese keminde úsh jyl tolyq emes otbasy mártebesi bar otbasylardaǵy balalar, bala kezinen múgedekter, birinshi jáne ekinshi toptardaǵy múgedekterdi tárbıelep otyrǵan otbasylardyń balalary basymdyqpen qol jetkizbek. «Oblys ákiminiń grantyna» ıe bolǵan stýdent jergilikti atqarýshy organmen jáne joǵary oqý ornymen úsh jaqty shartqa otyryp, dıplom alǵan soń 5 jyl boıy oblysta jumys isteýge mindetti. Al dıplom alýǵa jetpeı oqýdan shyǵyp ketken jaǵdaıda oqýǵa jumsalǵan qarjy men shákirtaqy oblystyq bıýdjetke qaıtarylady.
Oblys ásirese dárigerlerge muqtaj dedik qoı. О́zge óńirlerden medısına mamandaryn tartý úshin granttan bólek, bir jolǵy kótermeaqy tóleý máselesin de oblystyq máslıhat depýtattary qoldap, arnaıy sheshim shyǵarǵan bolatyn. Iаǵnı buryn aýyldyq eldi mekenderge baryp, qyzmetke kirisken jas mamandarǵa 1 mln teńge kóleminde bir jolǵy kótermeaqy berilse, bıyldan bastap oblys ortalyǵynan 500 shaqyrym qashyqtyqtaǵy Bókeı ordasy, Jánibek aýdandaryna qyzmetke baratyn mamandarǵa 5 mln teńge kótermeaqy beriledi. Al Oral qalasynan 250 shaqyrymdaǵy aýylǵa baryp eńbek etse, 2,5 mln teńge, shaharǵa jaqyn mańdaǵy Báıterek, Terekti, Tasqala aýdandarǵa baratyn mamandarǵa 1,5 mln teńge kótermeaqy usynylady. Qalada jumysqa ornalasýshylarǵa 1 mln teńge kóleminde kótermeaqy qarastyrylǵan jáne turǵyn úımen qamtamasyz etiledi.
Batys Qazaqstan oblysy
