Prezıdenttiń bul qadamy elimizdegi qoǵamdyq dıalogti nyǵaıta túsý úshin jasalǵany málim. Osy mańyzdy da, qajetti usynystan keıin, halyq arasynda qoǵamdyq birlestikter, uıymdar qurylyp, joǵary jáne orta deńgeıdegi úkimet organdarymen halyq ortasynan shyqqan ujymdar arasyndaǵy tikeleı baılanystar, «altyn kópir» paıda bola bastady. Aldyn ala aıta keteıik. Bizdiń Túrkistan oblysynda ótken jyly «Ádil bıler» qoǵamdyq birlestigi qurylyp, jergilikti memlekettik organdarmen, aýdan jáne aýyl okrýgteriniń ákimderimen birgelese el men eldegi jer týraly, otbasylyq arazdyqtar men ózara kıkiljińder, turmystyq-áleýmettik jáne de basqa da máselelerdi ýaqtyly, der kezinde sheshýde aýqymdy jumystar júrgizip keledi. Bul degenińiz – aýdandyq quqyq qorǵaý oryndarynyń onsyz da qordalanyp qalǵan jumystaryna ońdy, nátıjeli kómek degen sóz.
Sonymen qatar «Ádil bıler» qoǵamdyq birlestiginiń bıleri men alqa músheleri qalalar men kentterdegi, eldi mekenderdegi tazalyq, kógalandyrý, aýyz sýmen, tabıǵı gaz, elektrjúıesimen qamtý, az qamtylǵan otbasylaryn qoldaý, kómek berý máselelerimen de tikeleı aınalysýda. Osy bir, ata-babamyzdan, san ǵasyrlar boıy kele jatqan «Bıler mektebin» jandandyryp, qaıta qurý úrdisi tek qana bizdiń oblysta ǵana emes, Aqmola, Jambyl, Qyzylorda jáne basqa da oblystardaǵy aýdandar men eldi mekenderge úlgi retinde taratylýda. Prezıdentimizdi is júzinde qoldaý degenimizdiń naqty mysaly dep, «Ádil bıler» qoǵamdyq birlestiginiń jumysyn aıtsaq bolady.
Ulttyq quryltaıda Prezıdent el kókeıinde júrgen máseleler boıynsha óz oı-pikirin de ortaǵa salady. Biz qolǵa alǵan saıası-ekonomıkalyq reformalardy qoǵamdaǵy tereń áleýmettik-mádenı ózgeristermen qatar iske asyrýymyz kerek. Ádiletti Qazaqstandy qurý úshin árbir otandasymyz adal azamat bolýǵa umtylýy qajettigi aıtyldy. Ulttyq biregeıligimizdi nyǵaıtyp, elimizdiń jańa qundylyqtaryn ornyqtyrý úshin júıeli jumys jasalýǵa tıis deı kele, Memleket basshysy osy jumystardyń segiz baǵytyn naqtylady.
Búginde memleketimiz kóptegen qundy is-shara jasaýda. Sonyń mańyzdylarynyń biri – ǵylym akademııasyn qaıta qurý. Ultymyzdyń damý jolynda jáne de bir mańyzdy másele, ol memlekettik ana tilimizge degen qoldaý. Negizi, Ata Zańymyzda anyq, naqty aıtylǵan: Qazaqstan Respýblıkasynyń árbir azamaty bilim alýǵa, ǵylymı izdenister, jumystar júrgizýge quqyly. Sondyqtan da árbir azamatqa qaı jerde de, qalalyq ne, aýyldyq jerde turmasyn ǵylymı jumystarmen aınalysýyna tolyq múmkindikter jasalýǵa tıis. Rasyn aıtsaq, qazaq tiliniń jan-jaqty damýynyń birden-bir joly ol – qazaq ádebıetiniń, sonyń ishinde fılologııa salasynyń aýqymyn arttyrý. Iаǵnı ǵylymı jumystaryn tek qana kúndizgi joǵary oqý oryndarynda ǵana emes, negizgi mekenjaıy, jumys ornynan qol úzbesten, syrttaı, osy bir ultymyzǵa óte qajetti qazaq ádebıeti – fılologııa ǵylymyn damytýǵa shekteý jasalmastan múmkindik berý. Bul – bizdiń, árbir azamatymyzdyń biregeı ǵylymmen aınalysýyna tolyq jol ashylady degen sóz.
Aıypbergen BALTABAIULY,
Qazaqstan Jazýshylar
odaǵynyń múshesi
