Ilham Álıev ekinshi Qarabaq soǵysynan keıin qoldaý bildirgen elderdi atady.
«Qazaqstan Fızýlı aýdanynda Jastar shyǵarmashylyq ortalyǵyn, О́zbekstan mektep salyp jatyr. Mektep tamyzda, al ortalyq jyl sońyna deıin daıyn bolady. Bul - qoldaýdyń sımvoly. Soǵystan keıin shet elder qanshama qoldaý bildirdi. Atap aıtaıyn, bul óte mańyzdy qımyl ári yntymaqtastyqtyń úlgisi boldy», dedi Ázerbaıjan prezıdenti.
Aıta keteıik, ótken jyly Qazaqstan Prezıdentiniń sheshimimen Fızýlı qalasynda Qurmanǵazy atyndaǵy shyǵarmashylyqty damytý ortalyǵynyń irgesi qalanǵan edi.
Memleket basshysy qazaq halqynyń atynan jasalǵan bul syılyq qos el arasyndaǵy dostyqtyń, baýyrlastyqtyń jáne ózara qoldaýdyń taǵy bir nyshany bolatynyn atap ótken.
О́ner ortalyǵynyń jalpy aýdany – 3100 sharshy metr. Eki qabatty ǵımarat 600 adamǵa arnalǵan. Ortalyq osy jyldyń jeltoqsanynda paıdalanýǵa beriledi.
