Jıynǵa Birikken Ulttar Uıymy Balalar qorynyń (IýNISEF) Qazaqstandaǵy ókili Artýr van Dızen, Densaýlyq saqtaý, Eńbek jáne halyqty áleýmettik qorǵaý, Aqparat jáne qoǵamdyq damý, Sıfrlyq damý, Ishki ister vıse-mınıstrleri, Ulttyq statıstıka bıýrosynyń jáne Balalardyń quqyqtaryn qorǵaý komıtetiniń basshylary qatysty.
IýNISEF ókilderi Áleýmettik kodekstiń qabyldanýyn, óńirlerde Otbasynyń sıfrlyq kartasy men otbasyn qoldaý ortalyqtarynyń qurylýyn oń baǵalady.
Sondaı-aq olar áleýmettik jumystyń qoljetimdiligin, sapasy men tıimdiligin arttyrý maqsatynda áleýmettik qyzmet kórsetý júıesin odan ári damytýǵa tehnıkalyq qoldaý jáne kómek kórsetýge daıyn ekenderin jetkizdi.
Sonymen qatar IýNISEF-tiń balalardyń ómir súrý sapasyn jaqsartý, balalyq shaqty qorǵaý, áleýmettik qyzmetter jáne t. b. máseleleri boıynsha memlekettik organdarmen odan ári yntymaqtastyq máseleleri talqylandy. Atap aıtqanda, AÁK baǵdarlamasyn, balalardyń hal-ahýal ındeksin, balanyń sıfrlyq kartasyn jetildirý, balalardy ámbebap balalar járdemaqylarymen qamtýdy (halyqaralyq tájirıbe negizinde) keńeıtý boıynsha jańa sheshimderdi ázirleý úshin IýNISEF-tiń QR Úkimetimen yntymaqtastyǵyn damytý josparlanyp otyr.
IýNISEF-tiń balalardy qorǵaý sharalaryn kúsheıtý, zańnamany nyǵaıtý, máseleniń shyǵý sebepterimen jumys isteýge erekshe nazar aýdara otyryp, bala ómirinde oryn alýy múmkin qolaısyzdyqtardyń aldyn alý, bilim berýdiń qoljetimdiligin arttyrý, memlekettik qyzmetterdi sıfrlandyrý, bala jábirlenýiniń aldyn alý jáne balalarǵa qatysty zorlyq-zombylyqqa qarsy áreket etý jáne t. b. boıynsha usynymdary birlesip qarastyrylady.
