Prezıdentke elimizde sybaılas jemqorlyqqa qarsy is-qımyl boıynsha qabyldanyp jatqan sharalar týraly Sybaılas jemqorlyqqa qarsy qyzmettiń esebi berildi.
Memleket basshysyna vedomstvonyń jumysynda sybaılas jemqorlyqtyń alǵysharttaryn joıýǵa basa nazar aýdarylǵany baıandaldy.
Ashat Jumaǵalıdyń aıtýynsha, sybaılas jemqorlyq táýekelderine syrttan taldaý júrgizý kezinde jerdi bólý jáne Almatynyń qala qurylysyn damytý isin josparlaý barysynda jıi qaıtalanatyn zań buzýshylyqtarǵa jol berilgeni anyqtaldy.
Sonymen qatar kezdesýde Memleket basshysyna bilim berý salasyndaǵy bıýdjettik ótinimderdi ázirleý tetikteriniń jetildirilmegenine, qyzmetkerlerdi bir ortalyqtan esepke alýdyń bolmaýyna jáne qarjy jymqyrýǵa ákep soqtyrǵan býhgalterlik júıelerdiń qazynashylyqtaǵy derekter bazasymen biriktirilýine baılanysty táýekelder anyqtalǵany jóninde aqparat berildi.
Prezıdent bul saladaǵy sybaılas jemqorlyq faktileriniń aldyn alý mańyzdy ekenin jáne prosesterdi sıfrlandyrý qajettigin erekshe atap ótti.
Qasym-Jomart Toqaevqa bıylǵy 6 aıda 130 nysanǵa taldaý jáne monıtorıng júrgizilgeni, jemqorlyqty joıýǵa qatysty 1000-nan astam usynys engizilgeni týraly málimet berildi.
Kásipkerlikti damytýǵa kedergi keltiretin ákimshilik tosqaýyldardy joıý úshin «Bızneske jol» jobasyn júzege asyrý isi jalǵasady. Bul bastama qolǵa alynǵan sátten beri 21 myń bıznes sýbektisine kómek kórsetildi, 400-den astam túıtkildi keıs sheshimin tapty.
Budan bólek, Ashat Jumaǵalı Qasym-Jomart Toqaevqa sybaılas jemqorlyqqa qatysty birqatar zań buzýshylyqtyń, sonyń ishinde olıgopolııa ókilderi jasaǵan zańsyz áreketterdiń jolyn kesý, sondaı-aq keltirilgen shyǵyndardy óteý jáne aktıvterdi qaıtarý sharalary týraly baıandady.
Jyl basynan beri elimizde 1000-ǵa jýyq sybaılas jemqorlyqqa qatysty qylmys tirkeldi, 700-den astam adam áshkerelendi, onyń 98-i túrli deńgeıdegi basshylar.
Sotqa deıingi aıaqtalǵan tergeý amaldarynyń nátıjesi boıynsha 232,6 mıllıard teńge óteldi.
Jalpy, 1,5 jylda bıýdjetke jáne kvazımemlekettik sektor sýbektilerine shamamen 860 mıllıard teńge kóleminde múliktik aktıvter men aqshalaı qarajat qaıtaryldy.
Kezdesý sońynda Qasym-Jomart Toqaev sybaılas jemqorlyqqa qarsy júıeli jumystardy jalǵastyrýdy, ásirese áleýmettik mańyzy bar salalarǵa basa mán berýdi tapsyrdy. Sondaı-aq aldyn alý sharalarynyń asa mańyzdy ekenin aıtty.
