Chempıondar lıgasynyń irikteý kezeńine qatysyp jatqan elordanyń «Astanasy» Eýrokýbok básekesiniń alǵashqy aınalymynda Grýzııanyń «Dınamo» klýbyn jarys jolynan yǵystyrǵannan keıin el chempıonatyndaǵy kezekti týr oıynyn sátsiz ótkizdi. О́z alańynda «Atyraýdy» qabyldaǵan astanalyqtar kútpegen jerde týrnır kestesiniń qaq ortasynda kele jatqan ujymmen teń tústi – 0:0. Bul básekede Grıgorıı Babaıan negizgi quramnyń fýtbolshylaryna demalys berip, alańda az ýaqyt ótkizip júrgen fýtbolshylarǵa kóbirek múmkindik berip kórgen edi. Alaıda ekinshi quramnyń oıynshylary bapkerler quramy men jankúıerlerdiń senimin aqtaı almady.
«Astananyń» upaı joǵaltqanyn týrnır kestesinde elordalyqtardy ókshelep kele jatqan «Ordabasy» men «Aqtóbe» klýbtary tıimdi paıdalanyp ketti. 15 týrdan keıin «Astanamen» birdeı upaı jınap, kóshbasshylyqty bólisip kele jatqan Shymkenttiń «Ordabasy» klýby bul týrda Petropavldyń «Qyzyljar» komandasymen kezdesip, sońǵy mınýttarda Erkebulan Tuńǵyshbaevtyń soqqan golynyń arqasynda qonaqtardan 2:1 esebimen basym túsip, týrnır kestesinde 42 upaımen jeke-dara kósh bastady. «Astananyń» enshisinde 39 upaı bar.
Al «Aqtóbe» klýby Qobylandy batyr atyndaǵy ortalyq stadıonda Qyzylordanyń «Qaısaryn» 1:0 esebimen tize búktirip, kezekti úsh upaıyna qol jetkizdi. 13 myńǵa jýyq jankúıer tamashalaǵan kezdesýdegi jalǵyz ári jeńis golyn birinshi taımnyń sońynda aqtóbelikterdiń fransııalyq shabýylshysy Ýgo Vıdemon soqty. Qatarynan úshinshi oıynda jeńiske jetken Andreı Karpovıch shákirtteri týrnır kestesinde 34 upaımen úshinshi orynda keledi. «Ordabasy» men «Astana» klýbtaryna qaraǵanda «Aqtóbe» bir oıyn kem ótkizgenin aıta keteıik.
Sondaı-aq 16 týrda «Tobyl» óz alańynda «Oqjetpesti» qabyldap, 2:0 esebimen basym tússe, «Shahter» Qaraǵandyda «Kaspııdi» qapy qaldyrdy – 1:0. Al «Qaırat» pen «Maqtaaral» (2:2) jáne «Jetisý» men «Aqsý» (1:1) arasyndaǵy oıyndarda teń esep tirkeldi.
