Ulttyq ekonomıka mınıstri Álibek Qýantyrovtyń baıandaýynsha 6295 aýyldyq eldi mekenniń ishinde aýyl turǵyndarynyń 93%-yn quraıtyn damý áleýeti joǵary 3,5 myń aýyl anyqtalǵan, olardy damytý «Aýyl – El besigi» jobasy sheńberinde basym baǵyt retinde júzege asyrylyp keledi.
Bıyl ony júzege asyrýǵa respýblıkalyq bıýdjetten 198,2 mlrd teńge bólindi.
Úkimet basshysy 2019-2022 jyldary áleýmettik jáne ınjenerlik ınfraqurylymdy damytý boıynsha myńnan astam aýylda 3,7 myńnan astam joba iske asyrylǵanyn, sondaı-aq 33 myń jumys orny qurylǵanyn atap ótti.
Bıyl 800 eldi mekende shamamen 2 myń joba júzege asyrylady.
Sonymen qatar «Aýyl – El besigi» sheńberinde salynǵan obektilerdi paıdalanýǵa berý merzimderiniń buzylýy áli de ózekti másele bolyp otyr.
Premer-mınıstr bıýdjet qarajatyn tıimsiz josparlaý jáne paıdalaný, tenderlerdi ýaqytynda ótkizbeý, tıisti baqylaýdyń bolmaýy obektilerdi engizý merzimderiniń buzylýyna ákeletinin atap ótti.
«О́ńirlerde qarajatty tıimdi paıdalaný óte mańyzdy. Bir aýdanda birneshe joba iske asyrylyp, basqa aýdanda birde-bir joba júzege asyrylmaıtyn jaǵdaılar bolmaýy kerek», dedi Álıhan Smaıylov.
Ol sondaı-aq Aýyldyq aýmaqtardy damytýdyń 2027 jylǵa deıingi tujyrymdamasy sheńberinde «Aýyl – El besigi» jobasy aýyl ınfraqurylymyn jańǵyrtý boıynsha negizgi quraldardyń biri bolyp belgilengenin atap ótti.
Otyrysty qorytyndylaı kele, Úkimet basshysy «Aýyl – El besigi» jobalaryn sapaly jáne ýaqytynda iske asyrýdy qamtamasyz etý, sondaı-aq olardy barynsha qarjylandyrý máselesin pysyqtaý qajettigin atap ótti. Premer-mınıstr aýyldyq aýmaqtardy damytý úshin jeke ınvestısııalardy tartý jumysyn jedeldetýdi, Ulttyq ekonomıka mınıstrligi men múddeli memlekettik organdaryna jáne oblys ákimdikterine Aýyldyq aýmaqtardy damytý tujyrymdamasynyń nysanaly ındıkatorlaryna qol jetkizýdi qamtamasyz etýdi tapsyrdy.
