«Men jaqynda Mádenıet jáne sport mınıstri Ashat Oralovtyń qabyldaýynda boldym. Onda biz kıno men teatr óneri týraly sóz qozǵadyq. Solardyń ishinde kelesi jyly Sáken Seıfýllınniń 130 jyldyǵyna baılanysty kıno ssenarıı men operany usyndym. Mınıstr osy máselege baılanysty áleýmettik jelidegi paraqshasynda «Akter, jazýshy Qanat Júnisov kıno túsirýge baılanysty óziniń usynystarymen keldi. Ásirese opera qyzyǵýshylyq týdyrdy», degen maǵynada jazba qaldyrdy. Osyny keıbir BAQ durys túsinbeı jazba jarııalaǵan eken. Saıttar asyǵystyq tanytyp, Sáken jaıly fılm túsiriletin boldy, tipti keıbireýleri Sáken jaıly fılm túsirildi, daıyn», dep jazyp jiberipti.
Bul jerde men usynǵan ssenarıımen kıno túsirý úshin, en aldymen ulttyq kınony qoldaý memlekettik ortalyǵy ótkizetin irikteýge qatysý kerek. Ol jerde túsirilim tobynyń qujattary tekseriledi. Odan keıin úlken kıno mamandarynan quralǵan saraptamalyq keńes bar. Saraptamalyq keńes ár ssenarııdiń kórkemdik deńgeıin qaraıdy. Osy irikteýden ótse ǵana kıno túsiriledi. Túsirilim tobynyń bul irikteýge daıyndyǵy jaqsy. Ssenarıı buǵan deıin de kınotanýshylardyń súzgisinen ótken. Jaqsy resenzııalar jazylǵan. Naǵyz ulttyq fılm statýsyna laıyqty joba ekeni aıtylǵan. Degenmen sońǵy sózdi bıylǵy saraptamalyq keńes aıtady. Solardyń irikteýinen ótsek qana kıno túsiremiz. Endi Sáken jaıly fılm túsiretin ýaqyt keldi. Onyń ústine kelesi jyly 130 jyldyq mereıtoıy kele jatyr. Sákenniń qazaq tarıhynda atqarǵan uly isteri az emes. Qaı qyrynan alsa da qazaq ulty osyndaı dep maqtanyshpen kórsetetin qaıratker. Sákenniń qıly qaıshylyqqa toly taǵdyry barlyǵy kıno túsirýge suranyp tur. Sondyqtan men mınıstrlikke úlken usynys jasadym.
Endi operaǵa keletin bolsaq, bul operany kompozıtor Álibı Ábdinurov ekeýmiz jazdyq. Opera ótken jyly respýblıkalyq «Dala daýysy» baıqaýynda gran-prı syılyǵyn jeńip alǵan. Kásibı úlken mamandardyń súzgisinen ótken. Operaǵa qyzyǵýshylyq týdyratyn sebebi - bizde ulttyq opera óneri kenjelep qaldy. Sondyqtan operany damytýymyz kerek. Mádenıet jáne sport mınıstri Ashat Oralov: «Bul jobany qoldaýymyz kerek», dep óz oıyn aıtty. Endi kelesi jyly kınomyz taspalansa, operamyz sahnalaný úshin jan-jaqty daıyndyqty júrgizip jatyrmyz», dep oıyn aıaqtady Qanat Júnisov.
