Foto: QR Prezıdentiniń janyndaǵy Memlekettik basqarý akademııasynyń baspasóz qyzmeti
Kezdesý IPMA® «Jobaǵa baǵdarlanǵan qoǵamdy ilgeriletý» zertteý jobasy aıasynda ótti.
Jobanyń maqsaty – búgingi tańda jobalyq basqarý isi neǵurlym damyǵan bes eldegi (Germanııa, Qytaı, Qazaqstan, Horvatııa, Perý) keıs-zertteýler negizinde kásibı uıymdardyń qoǵamnyń jobaǵa baǵdarlanýyna áserin anyqtaý. Doktor Reınhard Vagner osy zertteý jobasynyń jetekshisi bolyp tabylady jáne jobaǵa baǵdarlanǵan qoǵamdy ilgeriletýdegi tájirıbelerimen egjeı-tegjeıli tanysý úshin osy atalǵan barlyq elge barýdy josparlap otyr.
Kezdesý aıasynda rektor Erlan Qýanyshuly memlekettik basqarý júıesinde jobaǵa baǵdarlanǵan qoǵamdy ilgeriletýdegi Akademııanyń róli jaıynda aıtty.
«QR Prezıdentiniń janyndaǵy Memlekettik basqarý akademııasy jobalyq basqarýdyń ulttyq júıesin qalyptastyrý, Ulttyq jobalyq keńseni, memlekettik organdardyń jobalyq keńselerin qurý jáne olardyń qyzmetin retteý jónindegi normatıvtik-quqyqtyq qujattardy ázirleý máselelerinde negizgi ról atqardy jáne úılestirýshisi boldy. Jobalyq menedjmentti damytý ortalyǵyn qurý Akademııanyń biryńǵaı oqý-ádistemelik alań jáne qazaqstandyq tájirıbeniń ereksheligi men memlekettik sektordaǵy basqarý qyzmetiniń erekshelikterin eskeretin jobalyq menedjment salasyndaǵy memlekettik qyzmetshilerdiń bilimi men quzyretterin júıeleý boıynsha tolyqqandy baza retinde qalyptasýyna yqpal etti. 2018 jyldan bastap Akademııa 30 myńnan astam adamdy oqytty, QR ST ISO ulttyq standarty jáne jobalyq menedjment salasyndaǵy Prince2® brıtandyq standarty boıynsha 3 myńǵa jýyq adamdy sertıfıkattaýdan ótkizdi. Akademııanyń sertıfıkattalǵan joba menedjerleriniń basym bóligi ortalyq jáne jergilikti memlekettik organdardyń qyzmetkerleri bolyp tabylady jáne olar elimizdiń jobalyq basqarý ekojúıesinde jumys isteıdi», dedi rektor.
Doktor Reınhard Vagner Akademııanyń úlesin jaqsy baǵalady, sondaı-aq Qazaqstanda jobalyq menedjmentti damytý boıynsha odan ári jumys júrgizý maqsatynda saraptamalyq usynystaryn berdi.
«Qazaqstan álemdik aýqymda ázirlengen ádisnamalardy, onyń ishinde Halyqaralyq standarttaý uıymynyń (ISO), AQSh-tyń Jobalardy basqarý ınstıtýtynyń jáne álemdik standart bolyp tabylatyn IPMA ádisnamasyn paıdalanady. Meniń oıymsha, bul barlyq qoljetimdi standarttardy biriktirip, olardy ózderińizdiń jobalaryńyzǵa qolaıly etkenderińiz óte jaqsy qadam. Men másele ádisnamada ǵana emes, sondaı-aq adamdardyń rýhy men oılaýynda ekenin únemi aıtamyn. Sizder el ıgiligi úshin ózderińizdiń ne istep jáne qalaı istep jatqandaryńyzdy kórsetkenderińizdi, aıtqandaryńyzdy qalar edim», dedi ol.
Sondaı-aq doktor Reınhard Vagnerdiń Qazaqstanǵa sapary barysynda Akademııanyń Alma Mater Europaea eýropalyq ýnıversıtetimen yntymaqtastyq máseleleri talqylandy.
