Mınıstrliktiń din salasyndaǵy jumysynyń basty strategııalyq baǵyty – memleket damýynyń zaıyrly qaǵıdattaryn nyǵaıtýǵa, úılesimdi memlekettik-konfessııalyq qatynastardy qamtamasyz etýge jáne qoǵamda radıkaldy ıdeologııanyń taralýyna jol bermeýge negizdelgen. Bul din salasyndaǵy jumys ataýly aqparattyq-túsindirý, ınternet keńistikte dinı ekstremızmge qarsy nasıhattaý men ońaltý jáne deradıkalızasııalaý jumystary negizinde iske asyrylyp jatyr.
Mınıstrlik halyqtyń dintanýlyq saýattylyǵyn arttyrýǵa, din salasyndaǵy memlekettik saıasattyń basymdyqtaryn túsindirýge, dinı ekstremızmniń aldyn alý jáne radıkaldy dinı ıdeologııalarǵa qarsy ımmýnıtetti qalyptastyrýǵa 3 028 adamnan quralǵan 228 óńirlik aqparattyq-túsindirý tobyn jumyldyrǵan. Nátıjesinde, bıyl birinshi jartyjyldyqta 17 500 is-shara uıymdastyrǵan. Oǵan 700 myńǵa jýyq azamat qatysqan.
Radıkaldy dinı aǵymdar ıdeologııasy negizinen ınternet resýrstar arqyly taralatyny belgili. Aqparat jáne qoǵamdyq damý mınıstrligi deregin baǵdarlasaq, ońaltý jumysyna destrýktıvti dinı aǵym ıdeologııalaryn nasıhattaýǵa qarsy tura alatyn jáne azamattardy dástúrli ıslam prınsıpterine jáne Qazaqstan qoǵamynyń qundylyqtaryna beıimdeıtin joǵary bilikti teologter men psıhologter, Qazaqstan musylmandary dinı basqarmasynyń resýrstary tartylǵan. Jalpy, túsindirý jumystarynyń nátıjeleri boıynsha dinı ekstremızm ıdeologııasyn ustanatyn adamdar sanynyń azaıýy baıqalypty. Demek elimizde radıkaldy jáne ekstremıstik kózqarastar men ıdeıalardy qabyldamaý ahýaly qalyptasqan. Buǵan qosa sala ókilderi sheteldik mıssıonerler tarapynan 10 quqyq buzýshylyqty anyqtaǵan.
Jalpy, 2023 jyldyń II toqsanynyń qorytyndysynda el aýmaǵynda 373 sheteldik mıssıoner tirkelgen. Onyń ishinde pravoslav, katolık, ıýdaızm, elýinshiler, adventıster, Iegova kýágerleri taǵy basqalary bar.
