Foto: Atyraý oblysy ákimdiginiń resmı saıty
О́ńirlik kommýnıkasııalar qyzmetiniń málimetterinshe múgedektigi bar adamdarǵa qatysty máselelerdi sheshý úshin Jol kartasy aıasynda birqatar oń ózgerister engizilgen.
Oblysta osyǵan deıin, múgedektigi bar jandardyń jáne erekshe qajettilikti kerek etetin bala asyrap otyrǵan analardyń máseleleri aıtyla kele, sol máselelerdi júıelep sheshimderin tabý maqsatynda ázirlengen arnaıy Jol kartasynda 16 másele qaralǵan. Bıylǵy jyldyń basynan beri, onyń jeteýi oń sheshimin tapqan. Endi, qalǵany birtindep sheshilmek. Máselen, mindetti gıgıenalyq quraldardyń bir jylǵa beriletin sany 730-dan 1460 danaǵa kóbeıtilgen. Sonymen birge múgedektigi bar bala asyrap otyrǵan analar qoǵamdyq kólikterde tegin qatynaıtyn bolǵan. Sondaı-aq múmkindigi shekteýli jandarǵa jylyna bir ret beriletin áleýmettik kómektiń mólsheri arttyrylǵan.
«Osyǵan deıin tegin beriletin ortopedııalyq buıymdar barlyǵyna birdeı yńǵaıly kele bermeıtin. Sol sebepti, múgedektigi bar jandar bul buıymdardy monetızasııalaýdy suraǵan bolatyn. Suranystary oryndaldy», deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetov.
Basqarma basshysynyń aıtýynsha arbaǵa tańylǵan balalarǵa arnalǵan oıyn alańdaryn salý jumystary Jol kartasynda josparǵa engizilgen. Sondaı-aq bul kúnderi múgedektigi bar jandarǵa kýrottyq-shıpajaılarǵa joldama berilgennen keıin, ýaqytyly temirjol bıletterin tabý qıyndyq týdyrady. Atalǵan máseleni ońtaıly sheshý úshin Jol kartasy aıasynda QR Indýstrııa jáne ınfraqurylymdyq damý mınıstrligine temirjol bıletterin brondaý nemese qosymsha vagondar engizý týraly usynys joldanǵan.
Sondaı-aq keler jyly ınvataksı qyzmetin ulǵaıtý boıynsha arnaıy usynystar engizilýde.
