Jarysty úsh klýbymyz jalǵastyrady

Tańdandyrǵan «Tobyl»

Eýrokýbok oıyndarynyń ekinshi irik­teý kezeńine jerebe tartylǵanda, fýtbol mamandary «Tobyl» men «Bazel» arasyndaǵy jupta shveısarııalyq ujym­nyń kelesi kezeńge óterine kúmándary bolmaǵan. О́ıtkeni «Tobylǵa» qaraǵanda «Bazeldiń» qandaı deńgeıdegi komanda ekenin fýtbol sarapshylaryn bylaı qoıǵanda, qarapaıym jankúıer de jaq­sy biledi. 129 jyldyq tarıhy bar «Bazel» klýby Shveısarııa chempıonatynda 20 márte top jaryp, 13 ret Shveısarııa kýbo­gin ıelengen. Odan bólek, Eýropa chem­­pıon­dary kýboginiń shırek fınalyna, Eýropa lıgasy men Konferensııa lıga­synyń jartylaı fınalyna deıin jetken.

Qostanaıdyń «Tobyly» Eýropanyń osyndaı dańqty klýbyna qarsy jasyl alańǵa shyqsa da, syrt alańdaǵy birin­shi oıynda sensasııa jasap, alań ıelerin óz jerinde 3:1 esebimen tize búktire al­dy. Jerlesterimizdiń qarymta match aldyn­da qarsylastarynan baqandaı eki dop basymdyǵy bolsa da, tájirıbe óz só­zin aıtty. «Ortalyq» stadıondaǵy oıyn­da «Bazel» fýtbolshylary jar­ty sa­ǵattyń ishinde eki gol soǵyp, «Tobyl» oıynshylaryn qıyn jaǵdaıǵa salyp qoıdy. Abyroı bolǵanda, úziliske deıin Serj Deble penaltıdi sátti oryndap, sonyń arqasynda qostanaılyqtardy kelesi ke­zeńge alyp shyqty – 1:2.

Osylaısha, eki oıynnyń qorytyn­dy­sy boıynsha «Tobyl» «Bazeldi» jarys jolynan yǵystyrǵannan keıin sheteldik basylymdar jerlesterimiz­diń jeńisine tańdanystaryn bildirip jatyr. Máselen, fýtbol translıasııalaryn júrgizetin amerıkalyq CBS Sports Golazo strımıngtik servısi óziniń Twitter arnasynda «Tobyldyń» jeńisine ar­naıy post arnady. «Byltyrǵy Konferen­sııa lıgasynyń jartylaı fınalısi «Bazel» dál osy týrnırdiń bıylǵy irikteý keze­ńinde Qazaqstannyń «Tobyl» komandasynan 4:3 esebimen jeńilip, jarysty ekinshi kezeńnen aıaqtaýǵa májbúr boldy», dep jazady.

Al Ýkraınanyń Ua-football.com basylymy «Tobyldyń» kelesi kezeńge shyǵýyn sensasııa dep baǵalady. «Mine, sizderge sensasııa! Keremet! Byltyrǵy jarystyń jartylaı fınalısi bıyl toptyq kezeńge de jete almady. «Bazel» kelesi kezeńge shyǵý múmkindiginen bir apta buryn óz ala­ńyndaǵy jeńilisinen keıin-aq aıyrylǵan edi», dep jazady ýkraınalyq basylym.

Endi qostanaılyq ujym týrnırdiń úshinshi aınalymynda Soltústik Irlan­dııanyń «Derrı Sıtı» komandasymen kezdesedi. Birinshi oıyn 10 tamyzda Qosta­naıda, qarymta kezdesý 17 tamyz kúni Soltústik Irlandııada ótedi.

 Joly bolǵan «Aqtóbe»

Bıylǵy Eýrokýbok oıyndaryna qa­ty­syp jatqan tórt komandamyzdyń ishin­de eń jeńil qarsylas «Aqtóbege» tússe de, byl­tyrǵy el birinshiliginiń kúmis júlde­ger­leri óz alańynda ótken qarym­ta matchta Grýzııanyń «Torpedosynan» je­ńilip qaldy – 1:2. Degenmen «Aq-qyzyldar» da «To­byl» sııaqty kelesi kezeńniń máselesin syrt alańdaǵy oıynda sheship qoıǵan soń (4:1), óz jerindegi jeńilis jalpy eseptegi jaǵ­daıǵa asa qatty áser ete qoıǵan joq – 5:3.

Jalpy, «Aqtóbeniń» jaýapty match­­­taǵy oıynyna qatysty maman­dar ta­rapynan da, jankúıerler ta­ra­­pynan da suraq kóp. О́ıtkeni Grý­zııa­nyń «Tor­pedo» klýby ózge úsh koman­da­myz­dyń qarsylastary sııaqty Eýropa ja­syl alańdarynda aýyz toltyryp aıtar­lyqtaı eshqandaı nátıjesi joq tó­men deńgeıdegi klýbtyń biri bolatyn. Eń keıingi ret olar 2019-2020 jylǵy Eýro­doda oıyndaryna qatysyp, bıyl ǵa­na Konferensııa lıgasynda oınaý múm­kindigine ıe bolǵan edi. Úsh jyl buryn «Torpedo» Eýropa lıgasynyń birinshi kezeńinde Shymkenttiń «Orda­basy» klýbynan eki oıynda 3:0 esebimen jeńi­lip, jarystan shyǵyp qalsa, bul joly «Aqtó­beden» utyldy.

Aqtóbedegi Ortalyq stadıonda ót­ken qarymta kezdesýde alań qoja­ıyn­darynyń fýtbolshylary nege ekeni túsiniksiz, janyn salyp oınaǵan joq. Bálkim, syrt alańdaǵy iri jeńisten keıin «Aqtóbe» oıynshylary ózderiniń sheberlikterine shamadan tys senip ketken bolýy kerek. Sonyń saldary­nan jaýapty matchta 1:2 esebimen qarsy­lastaryna jol berdi. Birinshi taım­daǵy Maksım Samorodovtyń goly da koman­da oıynshylaryn bosańsytyp jiber­gen sııaqty.

Nátıjesinde «Torpedo» fýtbolshy­lary ekinshi taımda uıymdasqan oıyn kórsetip, «Aqtóbe» qaqpasyna eki gol dary­ta aldy. Kýtaısı komandasy­nyń match aıaq­talǵanǵa deıin tarazy basyn teńes­tiretindeı múmkindigi bolǵan edi. Alaıda kezdesýdiń 77-mınýtynda qorǵaýshy Nıka Sandohadze eki mınýtta eki sary qaǵaz alyp, komandalastaryn qıyn jaǵdaıǵa qaldyryp ketti. 10 oıynshy bolyp qalǵan «Torpedo» fýtbolshylary aqyr sońynda ne shabýylǵa shyǵaryn, ne qorǵanysqa kóńil bólerin bilmeı, ábden abdyrap qaldy. «Aqtóbe» oıynshylary match sońyna deıin bir adam kóp bolyp oınasa da, bul basymdyǵyn júzege asyra almady.

Endi Andreı Karpovıch shákirtteri Konferensııa lıgasynyń úshinshi aınalymynda Rýmynııanyń «Sepsı» komandasymen kezdesedi. 2011 jyly irgeta­s­y qalanǵan «Sepsı» klýby keıingi úsh jyldan beri Eýrokýbok oıyndaryna turaqty qaty­syp keledi. Konferensııa lıgasynyń ekin­shi kezeńinde olar Bolgarııanyń dańqty SSKA Sofııa komandasymen kez­desip, eki oıynnyń qorytyndysynda qarsylastaryn 6:0 esebimen tize búktirdi.

 «Ordabasyǵa» ókpe joq

Quramy jaǵynan da, fýtbolshylar­dyń deńgeıi jaǵynan da Konferensııa lıga­synyń toptyq kezeńinde oınaý qurmetine laıyq bolǵan komanda­myz­dyń biri «Or­dabasy», ókinishke qa­raı, Eýrokýbok jarystarynan shyǵyp qaldy. «Á» degennen jyl saıynǵy Eýro­doda oıyndarynyń qatysýshysy Polshanyń «Legııa» klýbyna tap kelgen shymkenttik ujym eki oıynda da laıyqty óner kórsetip, minezdi komanda ekenin dáleldedi. Shymkentte ót­ken alǵashqy oıyndaǵy tóreshilerdiń qateligi bolmaǵanda, «Ordabasy» klý­bynyń kelesi kezeńge shyǵýy ábden múm­kin edi.

Polshadaǵy qarymta básekede de «Orda­basy» fýtbolshylary nashar oınady dep aıta almaımyz. Ras, jerlesterimiz birinshi taımda kóńildegideı óner kórsete almaǵanymen, ekinshi taım tolyǵymen bizdiń jigitterdiń basymdyǵymen ótti.

Úzilisten keıin «Ordabasynyń» shabýylshysy Vsevolod Sadovskıı esepti qysqartqanymen, 71-mınýtta Tomash Pekhart «Legııanyń» úshinshi golyn so­ǵyp, komandasyn kelesi kezeńge alyp shyqty. Matchtyń aıaqtalýyna alty mınýt qalǵanda Sergeı Malyı esepti 3:2-ge jetkizgenimen, «Ordabasy» fýtbolshylaryna tarazy basyn teńestirýge ýaqyt jetpeı qaldy.

«Ordabasy» – «Legııa» arasyndaǵy oıyn týraly el fýtbolynyń ańyzy Iýsýp Shadıev pikir bildirip, shymkent­tik komandanyń kelesi kezeńge shyǵýy­na tek sáttilik qana jetispeı qalǵanyn
aıtady.

«Ordabasy» eki matchta da jaqsy oınady. Birinshi kezdesýdegi tóreshiniń qateligin aıtpaǵannyń ózinde, qarymta oıynda da shymkenttikterdiń taza golyn eseptemeı qoıdy. «Legııanyń» úsh gol soǵýyna da «Ordabasynyń» qor­ǵaýshylary jol berip qoıdy. Bul oıynda «Ordabasy» jeńilmeýi kerek edi. Biraq «Legııa» fýtbolshylaryna da qurmetpen qaraǵanymyz jón. Olar ózderin jaqsy qyrynan kórsete aldy. О́kinishke qaraı, «Ordabasynyń» kelesi kezeńge ótýine qarapaıym sáttilik je­tispeı qaldy», deıdi Iýsýp Shadıev.

Endi Eýrokýbok oıyndaryn tórt komanda bolyp bastaǵan jerlesterimiz ja­rysty ári qaraı úsh ujymmen jalǵastyrady.