Almatyda jerleý qyzmetindegi kóleńkeli bıznestiń jyldyq aınalymy mıllıardtardy quraıdy – maman

2017 jyly Qazaqstan musylmandary dinı basqarmasy Ǵulamalar Keńesiniń XV májilisinde meshit jamaǵattary men jekeleı azamattardan kelip túsken su­raq­tar men ótinishterge baılanysty musylman zıratynyń qaǵıdalary men talaptaryn bekitken edi. Onda sharıǵat turǵysynan qabir ústinen qandaıda bir qurylys júrgizýge ruqsat joq delingen. 

Endi jerleý rásimi ǵana emes, beıit qulpytasyna qatysty ártúrli pikir aıtylyp júrgende, zırattarǵa QR ornatatyn jańalyq bizge de jetipti. Tehnologııanyń mundaı segmenti alǵash ret Azııanyń tehnologııalyq damyǵan elderinde – Qytaıda, Japonııada, Koreıa­da, keıinnen Reseıde paıda bolǵan. Al elimizde jańa tájirıbege úrke qara­ǵan­dar kóp bolypty.

Osy baǵdarlamany elimizge alyp kelgen Sergeı Profır jýrnalıstermen kezdesken kezde QR-kodtyń kóme­gi­men beıitte jerlengen marqumnyń fotosýretterin kórip, aýdıojazbalardan da­ýysyn estýge múmkindik bolatynyn aıtypty. Onyń aıtýynsha, jobadaǵy mátinniń mazmunyna tapsyrys berýshiniń ózi jaýapty. О́lilerge arnalǵan sıfrlyq joba avtorynyń aıtýynsha, qoǵam muny ázirge qup kórip otyr. Ázirge bul kúpirlik nemese dinimizge, saltymyzǵa qaıshy degender joq. Eger solaı bolǵan kúnniń ózinde avtordyń mundaı qarsylyqtarǵa aıtar dáleli de bar eken. Sebebi mundaı bastamalardy birden jersinip ketýi de, ha­lyqtyń birden qabyldap ketýi de qıyn kórinedi. 

Almatydaǵy salttyq qyzmet kórsetý kombınaty dırektorynyń orynbasary Marat Ismaılovtyń aıtýynsha Keńsaıdyń eń bıigindegi keıbir eskert­kishterdiń quny 100 myń dollar­dan asyp ketedi. Shamasy jetkender fransýz dızaınerlerine tapsyrys beredi eken.

Sonymen qatar áńgime barysynda  salttyq qyzmetke qatysty zańsyzdyqtyń bári aýrýhanada, máıithanadaǵy asa qupııa sanalatyn aqparattardyń syrtqa shyǵyp ketýimen bastalady eken. Basqasha aıtqanda, keıbir jekemenshik kompanııalar artynda qalǵan týystarynyń esigin qaǵyp ózderiniń «qyzmetterin» usynatyn kórinedi. 2019 jyly Astanada quqyq qorǵaý qyzmetkerleriniń qaza tapqandar týraly derekterdi jerleý qyzmetterine sat­qany týraly aqparat shyqqan. Sol kezde Sybaılas jem­qorlyqqa qarsy is-qımyl agenttigi prevensııa departamentiniń basshysy Anar Jarova jerleýmen aınalysatyn kompanııalar ókilderi qaıǵyly oqıǵadan keıin qaıtys bolǵan kisiniń úıine birden keletin jaǵdaılar jıi kezdesetinin aıtqan. Anyqtalǵandaı, qaza bolǵan azamattardyń jeke deregin «102» derekter bazasynan syıaqy úshin polısııa qyzmetkerleri bergen. Nátıjesinde, Astananyń Almaty jáne Saryarqa aýdandarynyń polısııa basqarmalary kezekshi bólimderiniń 9 qyzmetkeri (kóbisi maıor shenindegi) qyzmettik tár­tipti óreskel buzǵany, quqyq qorǵaý or­ga­nyna kir keltiretin teris qylyq jasaǵany úshin qyzmetten bosatylǵandyǵyn aıtyp ótti. 

 Sondaı-aq Marat Ismaılov Jerleý qyzmeti ındýstrııasyndaǵy kóleńkeli bıznestiń Almatydaǵy jyldyq aınalymy mıllıardtardan asyp ketýi múm­kin degen derekter bar ekenin, zańnyń bolmaýynan adamdar aqyrettik oryn­daryn da satyp alyp jatqanyn atap ótti. 

«Keńsaı» almaty­lyq­tardyń uǵymynda ulttyq panteon retin­de qalyptasyp qalǵan. Qoǵamda shamasy kelgenniń bári aqyrettik mekenin Keń­saı­dan saılap qoıǵysy keletinder da kóbeıip barady. Esenǵalı aqyn aıt­paq­shy, «Keńsaıdyń joly – qıyn jol, ony qıyndatqan – tiriler»,- dep Ismaılov oıyn túıindedi.