Ishki ister mınıstrliginiń resmı ókili Aqtoty Boranova mınıstrlikte «Elektrosamokattar jáne olardy joldarda paıdalaný kezindegi áreketter algorıtmi» taqyrybynda jıyn ótkenin habarlady. Jıynǵa qatysýshylar jaıaý júrginshiler men samokatshylardyń qaýipsizdigin qamtamasyz etý maqsatynda jańa shekteýler engizýdi usyndy.
«Halyqty engizilgen shekteýler týraly habardar etý maqsatynda mobıldi qosymshalardy paıdalaný usynyldy. Bul qosymshalarda samokatty arnaıy belgilengen oryndarǵa ornalastyrmaıynsha, sapar aıaqtaldy dep eseptelmeıdi. Jıynǵa qatysýshylar elektrosamokatty jaryqtandyrylmaǵan jerlerde, saıajaı joldarynda jáne kámeletke tolmaǵandardyń paıdalanýyna tyıym salýdy engizýdi usyndy. Samokatty kámeletke tolmaǵandar paıdalanbaýy úshin salmaq sanattaryna tyıym salý máselesi de qozǵaldy. Máselen, samokatqa salmaǵy 30 keli jáne odan joǵary adam mine alady», dep túsindirdi Aqtoty Boranova.
Onyń aıtýynsha, Ishki ister mınıstrligi tártip pen ereje buzǵan elektrosamokatshylardy «qara tizimge» engizýdi josparlap otyr.
«Kıksherıng kompanııalary nashar klıentterdiń jalpy tizimin qurýdy usyndy. Mundaı paıdalanýshylar kıksherıngpen aınalysatyn kompanııalardyń qyzmetimen paıdalana almaıdy», dep qosty Aqtoty Boranova.
«Qara tizimge» jol erejesin buzǵan, jolaýshylar men júkterdi tasymaldaý erejelerin saqtamaǵan nemese samokatty jolaýshylar tasymalyna kedergi keltiretin jerlerde qaldyrǵandar engiziledi.
Aıta ketsek, Memleket basshysy Qasym-Jomart Toqaev 2023 jyldyń 29 maýsymynda «Keıbir zańnamalyq aktilerge jol júrisin uıymdastyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵan edi. Bul zańda elektrosamokat júrgizýshilerine salynatyn aıyppuldar men birqatar jańa erejeler belgilengen. Zań 30 tamyzda kúshine enedi.
