Dana, oıshyl Abaıdyń jazýyndaǵy izgilik pen shýaq áli kúnge deıin qazaq dalasyna jaryq berip tur. Onyń lırıkalyq jyrlary men fılosofııalyq kózqarasy qasıetimen, tereńdigimen qundy.
Belgili sýretshi Á.Qasteevtiń 1945 jyly salynǵan «Jas Abaı» sýreti aqynǵa arnap jazylǵan basqa portretterden erekshe. Tarıhqa kóz salsaq, 1945 jyly Abaı sýretine arnalǵan respýblıkalyq baıqaý ótedi. Sol baıqaýda Ábilhan Qasteev týyndysy – «Jas Abaı» alabóten nazarǵa túsken. Sebebi sýretshilerdiń kóbisi Abaıdyń egde jastaǵy portretin salyp shyqsa, Qasteev qana erekshelenip, Abaıdyń 15-16 jastaǵy jetkinshek shaǵyn beınelegen. «Abaı joly» epopeıasynyń 1-tomyndaǵy «Qaıtqanda» taraýyn oqysaq, osy jas, bilimge umtylǵan Abaıdy kóremiz.
Á.Qasteev bar shyǵarmashylyq ǵumyrynda Abaıǵa arnap otyzǵa jýyq kartına salǵan. Biraq «Jas Abaıdyń» portreti salynǵan 1945 jyl – sýretshi shyǵarmashylyǵyndaǵy mańyzdy kezeń. Ol bozbala jigittiń este qalarlyq jarqyn beınesin jasaı bildi. Jas aqynnyń áli ashylmaǵan múmkindikteriniń kúshi men qýatyn sýreti arqyly kórsetti.
Avtor bul kartınany salý barysynda tikeleı Muhtar Áýezovpen áńgimelesip, maǵlumat jınaǵan. Jalpy, Qasteev qandaı sýret salsa da, aldymen kóziqaraqty adamdardan surap salatyn bolǵan. Osy «Jas Abaı» sýretin salarda da Muhtar Áýezovpen suhbattasa otyryp salyp shyǵady. Sonymen birge Abaıdyń aýylyna da barǵan.
Týyndyda jas Abaı kitap oqyp, alǵan áserin túý alysqa qarap qorytyp turǵandaı beınelengen.
