Bas jospar bekitildi

Bas sáýletshiniń málim­de­ýin­she, Qonaevta qurylys 2 kezeń boıynsha júzege asyrylady. Eń aldymen, qurylys eski shahar aýmaǵynda bastalady. Munda ákimshilik keńseler, turǵyn úıler, muz aıdyny, sporttyq-saýyqtyrý ortalyqtary salynady. Qapshaǵaı sý qoımasy­nyń jaǵalaýynda ornalasqan demalys oryndaryna ortaq velojol, býlvarlar salý da jos­parlanyp otyr. Sondaı-aq qaraýsyz qalǵan ǵımarat­tar, eski úıler súrilip, ornyna kóp­qabatty turǵyn úıler boı kótermek.

«Qurylystyń eski qala aýma­ǵynda bastalý sebebi – Bas josparǵa sáıkes munda 100 myń adam turǵylyqty meken etedi dep josparlanǵan. Iаǵnı áli de qala kelbetin retke keltirip, turǵyndar ómir súrýge yńǵaıly ortany qalyp­tastyrý qajet. «Jańa Ile» aýmaǵyndaǵy qalanyń bóligi de 100 myń turǵynǵa eseptelgen. Al ekinshi kezeń «Jańa Ile» tóńiregine ınjenerlik je­li­lerdi tartýdan bastalady. Jalpy, qurylysty bastaý úshin ekonomıkalyq keshendi jospar ázirlenip, Úkimet qaraýyna usynylady. Sodan keıin qarjy bólinip, barlyq is-shara qarqyn almaq. Qazirdiń ózinde shahar turǵyzýǵa nıetti ınvestorlar kóp. Alaıda olardy túbegeıli qurylysqa tartý úshin aldy­men ınfraqurylym máselesin she­shý qajet», deıdi bas sáýletshi B.Musylmanbekov.

Basqarma basshysynyń aıtýynsha, jaýapty kompanııa ókil­deri 200 myń turǵynǵa arnalǵan qalanyń Bas josparyn daıyndaýǵa 6 aı ýaqyt jumsaǵan. Odan keıin josparǵa birneshe ret ózgeris engizilip, joba qoǵamdyq tyńdalym jáne sarapshylar talqysynan ótken.

Buǵan deıin bekitilgen jos­par boıynsha shahar kólemi 9 myń gektardy qurasa, jańa jobada bul aýmaq eki ese úl­keıtilgen, ıaǵnı 19 myń gektarǵa josparlanǵan.

Qalanyń jańa jobasy jasyl jelekti nysandardyń (park, arboretým, botanıkalyq baq) kóp bolýymen erekshelenedi. Munyń barlyǵy «Jańa Ile» aýmaǵynda boı kóteredi. Sondaı-aq bul aýmaqta transporttyq-logıstıkalyq hab boı kóteredi dep kútiledi. Sebebi Eýropa jáne Qytaı arasyn baıla­nystyratyn temirjol Almaty oblysynyń jańa ortalyǵynda ornalasqan. Jobada áýejaıdyń da orny qarastyrylǵan. Jańa kelbetke ıe bolatyn Qonaev qalasynda keleshekte kóldiń oń jáne sol jaq bóligin baıla­nystyratyn avtojol kópiri salynady.