«Saýyqtyrý ortalyǵyn ashqannan beri osy mekemege basshylyq jasap kelemin. Árıne, alǵashqy kezde talaı qıynshylyqtar kezdesti, buryn balalar demalǵan korpýstardy jóndeý, kem-ketigin túzeýge qarjy taptyq. Senbi, jeksenbi kúnderi shtat qyzmetkerlerimen birlesip, senbilikter uıymdastyrdyq. Bul iste orynbasarlarym Rollan Dúısenbaı, Aqylbek Esimov, 43 jyldyq eńbek ótili bar saýyqtyrý ortalyǵynyń bas dárigeri Roza Qalıeva, aǵa ákimshilik qyzmetkeri Rızagúl Gýsakova kóp kómek kórsetti. Olar ońaltý ortalyǵyna emdelýge jáne taza aýamen tynystap, densaýlyǵyn túzeýge kelgendermen til tabysyp, aqyl-keńesterin beredi. Qazir bizdiń mekemede 200 adam qyzmet etedi», deıdi bizben áńgimesinde Arystan Janǵazıev.
Munda demalýshylarǵa barlyq jaǵdaı jasalǵan. Tórt mezgil taǵam beriledi. Em alýshylardyń bos ýaqytyn mándi ótkizýine kóńil bólinedi. Bılıard, ústel tennısi, jattyǵý jasaıtyn arnaıy bólmeler qashan kelseń de ashyq. Aptasyna birneshe ret sport jarystary ótip turady. Reti kelgende aıta ketý kerek, shıpajaı dırektorynyń birinshi orynbasary Rollan Meıramuly erkin kúresten KSRO sport sheberi, kezinde san márte dúbirli dodalarda top jarǵan. Shıpajaıdyń bas dırektory Arystan Arhımeduly da sportqa beıim, demalýshylar arasynda jarystardyń mándi ótýine kóńil bóledi. Shahmat týrnırinde 82 jastaǵy Esimhan Jýkıch, Baqytbek Qońdybaev sııaqty belsendi aqsaqaldar júldeli oryndardy bólisti. Em alýshylarǵa belgili ánshi Baýyrjan Isaev, Shýshınsk qalasynan kelgen ártister Gúlim Qudysbek, Nuraı Qabıden, Samǵaý bı tobynyń ónerpazdary, «Dýman» vokaldy aspaptar tobynyń ánshileri kóńildi kesh syılady. Shıpajaıdaǵy mýzykalyq jetekshi Birjan Hamzınniń aıtýynsha, demalýshylar 14 kúnniń ishinde bı bılep, túrli baıqaýlarǵa qatysady, kún aralatyp qyzyqty konsertterdi tamashalaıdy.
Saýyqtyrý ortalyǵynda qyzmet etetinderdiń barlyǵy – óz mamandyǵyn jetik meńgergen, jumys ótili 15-20 jyl, tipti odan da kóp, naǵyz óz isiniń maıtalmandary. Bas dáriger Roza Qalıeva – densaýlyq salasynda 43 jyldan beri úzilissiz qyzmet etip kele jatqan joǵary sanatty dáriger. Keıingi 7,5 jyldan beri óziniń bilimi men biliktiligin, mol tájirıbesin múgedekter men zeınetkerlerge arnaǵan. Dárigerler men uıqalaýshylar Zabıra Hasenova, Rýstam Valıýllın, Zına Batalova, Zúlfııa Qanǵojına, Anar Torǵaeva, balshyqpen emdeýshi Gúljan Eńkebaeva, Anna Stasenko qarapaıym eńbekterimen demalýshylar alǵysyna bólenýde.
Saýyqtyrý ortalyǵynyń bas dárigeri Roza Qalıevanyń aıtýynsha, munda medısınalyq qyzmettiń 47 túri bar. Tuzdy sý, magnıoterapııa, balshyqpen emdeý, uıqalaý, elektr, bıotron, parafın deısiz be, em alýshylar qalaýynsha paıdalana alady. Korpýstardyń irgesindegi Qotyrkól kóliniń sýy shıpaly, túrli dertterge myń da bir em. Ystyq jaz aılarynda demalýshylar kólge shomylady, kúnge qyzdyrynady.
«Átteń, sýmen emdeýge qajetti vannalar jetispeıdi. Qys mezgilinde arasy qashyq ekinshi jáne úshinshi korpýs arasynda dalaǵa shyqpaıtyn dáliz salynsa, oń bolar edi. Tipti jańa em alatyn korpýs salatyn ýaqyt jetti. Sport zaly qurylysyn da salý kerek. Munyń bári – sheshimin tabatyn problemalar. Internet, vaı-faı symdary jańartyldy», deıdi bas dáriger.
Qalaı degende de, saýyqtyrý ortalyǵynyń qyzmetine em alýshylar dán razy.
Ońdasyn ELÝBAI,
«Egemen Qazaqstan» gazetiniń ardager tilshisi
