Aqtobe IT-Hub-tyń negizgi mıssııasy – IT-startaptardy qoldaý, sıfrlyq bilim berý jáne tehnologııalar transferti, zamanaýı tehnologııalar salasyndaǵy talanttardy izdeý jáne olardyń áleýetin ashý, jalpy aımaqtaǵy IT salasyn damytý.
Hab sala qatysýshylary úshin birtutas ekojúıege jáne venchýrlyq ınvestorlardyń, iri bıznes pen tehnologııalyq startaptardyń qatysýymen salalyq forýmdar, bıznes-debattar, semınarlar, is-sharalar ótetin alańǵa aınalady.
Aqtobe IT Hub rezıdentteri jańa sıfrlyq ónimder men qyzmetterdi, onyń ishinde qala men iri ónerkásiptik kompanııalardyń máselelerin sheshýge baǵyttalǵan ónimderdi jasaýmen aınalysady. Jyl ishinde olar kem degende 150 ınkýbasııalyq baǵdarlama men 75 startap jobany iske qosýdy kózdep otyr.
Álıhan Smaıylov sıfrlyq tehnologııalar salasyn damytý úshin QR astanasynda salyqtyq preferensııalardy qarastyratyn jáne barlyq ákimshilik rásimderdi jeńildetetin halyqaralyq IT-hab qurylǵanyn atap ótti.
«Qazir nátıjelerdi kórip otyrmyz. Byltyrǵy jyldyń qorytyndysy boıynsha IT ónimderi men qyzmetteri esebinen $300 mln-nan astam eksport bar. Bıyl ol $500 mln qurap otyr. Eki-úsh jyldyń ishinde $1 mlrd dollarǵa jetedi dep kútilýde. Sondyqtan bul tájirıbeni taratý mańyzdy. Biz Qazaqstanda, onyń ishine Aqtóbeni qosqanda, osyndaı segiz ortalyq ashtyq. Bıylǵy jyldyń sońyna deıin taǵy altaýyn iske qosý josparlanyp otyr», dedi ol.
Premer-mınıstr árbir qalada qalalyq jáne aýyl jastarynyń sıfrlyq tehnologııalarda bilim alýǵa jáne qabiletterin damytýǵa múmkindik beretin IT-ındýstrııany damytý ortalyǵy bolýy kerektigin basa aıtty.
«Olar bolashaqta ekonomıkamyzdy sıfrlandyrýdyń negizi bolýy kerek. Sıfrlyq tehnologııalarsyz odan ári damý múmkin emes», dedi ol.
Sondaı-aq Aqtobe IT-habynda Úkimet basshysy men óńirdiń shyǵarmashyl jastarynyń kezdesýi ótti, onyń barysynda zııatkerlik menshik naryǵyndaǵy trendter, sondaı-aq jastar jobalaryn qoldaý sharalary talqylandy.
Premer-mınıstr respýblıkada aldaǵy 7 jylǵa arnalǵan Jastar saıasatynyń tujyrymdamasy qabyldanǵanyn, al zańdarda «kreatıvti ındýstrııa» uǵymy bekitilgenin jáne onyń quramyna kiretin qyzmet túrleri aıqyndalǵanyn aıta ketti.
«Osy baǵyttardyń barlyǵy boıynsha daryndy jastarymyzdyń ár salada qabiletterin damytýǵa kómektesý úshin memlekettik qoldaý sharalaryn kórsetemiz», dedi Álıhan Smaıylov.
