Qazir Qazaly aýdanynda 23 907 jas bar eken. Osylardyń 95,5 paıyzy aýylda turady. Jyl basynan beri aýdandaǵy «Jastar resýrstyq ortalyǵy» KMM qatarlastarynyń qatysýymen 180-nen astam is-shara ótkizipti. Ortalyq bastamasymen uıymdastyrylǵan «Jańa dáýir – jańa Qazaqstan» festıvali nátıjesinde ǵylymı jobalar baǵyty boıynsha úzdik dep tanylǵandarǵa Qorqyt ata atyndaǵy Qyzylorda memlekettik ýnıversıtetiniń oqý granty jáne 50, 25 paıyz jeńildikpen oqıtyn sertıfıkattar tabystalǵan. Basqa baǵyttar boıynsha úzdikterge qarjylaı da syıaqy berilgen. Jastardyń úmitin oıatqan bul is-shara aldaǵy ýaqytta da jalǵasyn tabady.
Eriktiler uıymdastyratyn «Jastar kerýeni» atty jastar jobasy bıyl jańa formatta ótti. Salt-dástúr sabaqtarynan bastap, tarıhı oryndardy aralaý, sporttyq is-sharalar, jas otbasylar, ákeler, analar saıystaryna jalǵasqan joba aıasynda gala-konsert qoıylady. Joba kezinde aýdandaǵy tıisti bólimder mamandary memlekettik baǵdarlamalar boıynsha keńes beredi. Otbasy qundylyǵyn arttyryp, bala tárbıesi men jas juptardyń shańyraǵyn bekem qylýdy kózdegen «Mahabbat marafony» juptyq júgirý saıysy da osy resýrstyq ortalyqtyń ıgi bastamasy. Halyqaralyq otbasy kúnine oraı ótkizilgen saıysqa Qazaly qalasy jáne aýdanǵa qarasty aýyldyq okrýgterden 50-ge jýyq otbasy qatysyp, baqtaryn synady.
Ortalyq bastamasymen «Jastar jármeńkesi» uıymdastyrylyp, alǵashqy jumys orny boıynsha – 7, jastar praktıkasy arqyly – 17, qoǵamdyq negizde 8 jas jumyspen qamtyldy.
«Biz bastaǵan taǵy bir joba – «Shet elderdegi Qazalylyqtar». Osy aýdanda týyp-ósip, bilim alyp, qazirgi kúni álemniń aldyńǵy qatarly memleketterinde oqyp nemese jumys istep júrgen jastarmen mektepterde onlaın, oflaın formatta kezdesýler ótkizildi. «Myń ret estigennen, bir ret kórgenniń artyq ekenin» bárimiz bilemiz. Shetelde alǵan bilimderin el bolashaǵy úshin jumsaıtyn jastarmen júzdesý talaılardyń armanyn ushtaǵany anyq», deıdi aýdandyq «Jastar resýrstyq ortalyǵy» KMM dırektory Nurbek Aqpanbetov.
Barlyq aýdanda bar osyndaı ortalyqtardyń arasynda syrdarııalyqtardyń da tájirıbesi erekshe. Syrdarııa aýdandyq jastar resýrstyq ortalyǵynyń Shirkeıli, Aıdarly, A.Toqmaǵanbetov, Amangeldi, Besaryq, Jetikól aýyldyq okrýgterinen jastar brıgadalary qaıta qurylyp, olardyń qataryna jumyssyz, NEET sanatyndaǵy jáne probasııa esebinde turatyndar qosyldy. Bıylǵy egin naýqanynda osy brıgadalardaǵy 200-ge tarta jas eńbek etedi. Ortalyq yqpalymen Amangeldi, A.Toqmaǵanbetov aýyldyq okrýgteri jastary Jańaqorǵan aýdanyndaǵy Jaıylma aýyldyq okrýgine tájirıbe almasýǵa jiberildi. Buryn qoly bos jastar bıyl 60 gektar aýmaqqa baqsha, kartop egip jatyr.
«Bul tájirıbeni qolǵa alǵandaǵy basty kózdegenimiz – aýdan jastary arasyndaǵy jumyssyzdyq deńgeıin tómendetý, – deıdi aýdandyq Jastar resýrstyq ortalyǵynyń basshysy Nurman Abdrasılov. – Biz qatarlastarymyzdyń eńbek etip, tabys tapqanyn qalaımyz. Osyndaı nıetpen qurylǵan «Shirkeıli» jastar brıgadasyndaǵy 30 jas qazir qurylys materıaldaryn shyǵaryp jatyr. О́zge brıgadadaǵylar aýdandyq, oblystyq kórmelerge, jármeńkelerge óz ónimderin aparyp, satýdy josparlap otyr. Byltyrǵy qorytyndy forýmda «Aıdarly» jastar brıgadasynyń brıgadıri Zeınolla Júsipov aýdan ákiminiń arnaıy júldesine ıe bolyp, 100 myń teńge syıaqy ıelendi. Memleket basshysy «Eńbekqor adam, kásibı maman eń syıly adam bolýǵa tıis» dedi. Eńbek etetin jastardy kótermeleý bıyl da josparlanyp otyr. Laıyqty jumys istegen jastar jyl sońynda arnaıy syılyqtarǵa ıe bolady.
Qazir aýdan jastarynda bos ýaqyt joq. Túrli baǵyttaǵy jyljymaly jármeńkeler aıasynda olarǵa is bastaýǵa qajetti keńes berilip, bos jumys oryndary usynylady. Aýdandyq jastar resýrstyq ortalyǵynyń uıymdastyrýymen aýdan jastaryna salamatty ómir saltyn nasıhattap, sportpen júıeli túrde aınalysýǵa shaqyratyn «Jeńimpaz bol!» densaýlyq festıvali ótti. Alda ulttyq sportty damytý maqsatynda jastar arasynda kókpar uıymdastyryp, «Syrdarııa barysy» saıysyn, «Áskerı qyzmet – abyroıly mindet» áskerı-patrıottyq forýmyn ótkizý josparlanyp otyr.
Jaqsylyqqa umtylǵan jastar bastamashy bolǵan ıgilikti ister aıasy jyl saıyn keńeıip keledi.
Qyzylorda oblysy
